कोरोना संक्रमित २०९९, एक लाख ४५ हजार ३७५ क्वारेन्टाइनमा
हेल्थपाटी - जेष्ठ २०, २०७७ १६:२५ मा प्रकाशित
अ +
अ -
काठमाडौं । नेपालमा कोरोना भाइरस रोग(कोभिड १९)बाट संक्रमित हुनेको संख्या २ हजार नाघेको छ । पछिल्लो २४ घण्टामा २८८ जनामा कोरोना भाइरस रोग(कोभिड १९) को पुष्टि भएको छ । स्वास्थ्य तथा जनसंख्या मन्त्रालयको नियमित प्रेस ब्रिफिङमा प्रवक्ता डा.विकास देवकोटाले देशका विभिन्न स्थानमा गरिएको प्रयोगशाला परीक्षणमा २८८ जनामा कोरोना पोजेटिभ देखिएको जानकारी दिनुभयो ।
यो संगै कोरोना संक्रमितको संख्या २ हजार ९९ पुगेको छ । जसमा १ हजार ९४९ पुरुष र १५० जना महिला रहेका छन् ।
आइसोलेसनमा उपचाररत संक्रमितहरु
प्रवक्ता देवकोटाका अनुसार प्रदेश नम्वर १ मा १२०, प्रदेश नम्वर २ मा ७११, बागमती प्रदेशमा २२, गण्डकी प्रदेशमा ३४, प्रदेश नम्वर ५ मा ६२२ र कर्णाली प्रदेशमा २५१ र सुदुरपश्चिममा ६५ जना गरि १ हजार ५६९ जना संक्रमितहरु आइसोलेसनमा उपचाररत छन् ।
संक्रमितको प्रादेशिक विवरण
आज गण्डकी प्रदेशको पर्वत र प्रदेश नम्वर ५ को प्यूठानमा पनि नयाँ संक्रमित देखिएसंगै ६१ जिल्लामा संक्रमण फैलिएको छ । कोरोनाबाट प्रदेश नम्वर २ अति प्रभावित भएको छ, त्यहाँका सबै आठ जिल्लामा गरि ८१६ जनालाई कोरोना पुष्टि भएको छ । प्रदेश नम्वर १ को ९ जिल्लामा १६८, बागमती प्रदेशका १२ जिल्लामा ५४, गण्डकी प्रदेशको ७ जिल्लामा ३७, प्रदेश नम्वर ५ को ११ जिल्लामा ६९९,कर्णाली प्रदेशको ५ जिल्लामा २५२ र सुदुरपश्चिमका सबै ९ जिल्लामा ७३ जना गरि २ हजार ९९ जनालाई कोरोना संक्रमणको पुष्टि भएको छ ।
२६६ जना निको भए
पछिल्लो २४ घण्टामा ४५ जना निको भएका छन् । भीम अस्पतालबाट २५,शिक्षण अस्पतालबाट हेटौडाकी ५४ वर्षकी महिला, गुल्मीमा ३१ वर्षका एक पुरुष, धरानबाट १८ जना र कपिलवस्तुबाट ९ जना डिस्चार्ज भएका छन् ।
देशभर डिस्चार्ज हुनेको सख्या २६६ पुगेको छ जसमा २१२ पुरुष र ५४ जना महिला रहेका छन् ।
डिस्चार्ज हुनेको प्रादेशिक विवरण
हालसम्म प्रदेश नम्वर १ मा ४८, प्रदेश नम्वर २ मा १०४, बागमती प्रदेशमा ३०, गण्डकी प्रदेशमा ३,प्रदेश नम्वर ५मा ७४ र सुदुरपश्चिममा ७ जना डिस्चार्ज भई घर गएका छन् ।
१ लाख ४५ हजार ३७५ जना क्वारेन्टाइनमा
प्रवक्ता देवकोटाका अनुसार, पछिल्लो २४ घण्टामा ३ हजार ४४० जनाको पीसीआर र आरडीटिबाट २ हजार ५८८ जनाको परीक्षण भएको छ । हालसम्म पीसीआरबाट ७५ हजार ३४३ जना र १ लाख १६ हजार ३४५ जनाको आरडीटिबाट परीक्षण भएको छ । आज १ लाख ४५ हजार ३७५ मानिस क्वारेन्टाइनमा बसिरहेका छन् ।
तपाईँको अभिमत