कोरोनाका कारण छैठाैं मृत्यु, अन्त्येष्टिकाे ५ दिनपछि कोरोना पुष्टि
भारतबाट नेपाल आउदै गर्दा जेठ १० गते डुम्रियागञ्जमा मृत्यु
काठमाडौं । भारतबाट अर्घाखाँची आउँदै गर्दा बाटैमा मृत्यु भएका एक युवकमा कोरोना भाइरस रोगको पुष्टि भएको छ । अहमदाबादबाट नेपाल आउदै गर्दा भारतको डुम्रियागञ्जमा जेठ १० गते मृत्यु भएका भुमिकास्थान नगरपालिका वडा नम्बर–९ ढिकुरेका ३४ वर्षका युवकको काेराेना रिपोर्ट पोजेटिभ आएको अर्घाखाँचीका प्रमुख जिल्ला अधिकारी विजय पौडेलले जानकारी दिनुभयो ।
उहाँका अनुसार नेपाल आउदै गर्दा बाटैमा मृत्यु भएका ति युवकलाई कपिलवस्तुकाे क्रिस्ननगर सिमाबाट संगै आउने साथीले अर्घाखाँची पुर्याएर परिवारको सहमतिमा जेठ १० गते नै शव गाडेका थिए । प्रजिअ अधिकारीले मृतकको स्वाब जेठ ११ गते नै संकलन गरि प्रादेशिक प्रयोगशाला बुटवलमा परीक्षण गर्दा केहीबेर अघि मात्रै मृतकको रिपोर्ट पोजेटिभ देखिएको जानकारी प्रयाेगशालाबाट आएको बताउनुभयो । युवकको अन्त्येष्टि गरिएको ५ दिनपछि कोरोना रिपोर्ट पोजेटिभ आएको पुष्टि प्रजिअ अधिकारीले गर्नुभयाे ।
ती युवकसंगै भारतबाट २ वटा बसमा करिव ५५ जना मानिसहरु आएको र उनीहरु सबैको कन्ट्याक्ट ट्रेसिङ सुरु भइसकेको र भोलीबाट पीसीआर परीक्षण सुरु गरिने बताउनुभयो । ती युवकसंगै आएका सबैजना क्वारेन्टाइनमा रहेको उहाँले बताउनुभयो । यसअघि सिन्धुपाल्चोककी एक महिला, गुल्मी, ललितपुर, बाँके र बारामा कोरोनाका कारण मृत्यु भएको थियो । भारतबाट नेपाल आउदै गर्दा नेपालको सिमा नजिकै बाटैमा मृत्यु भएको तर कोरोना पुष्टि नेपालमै भएको तथा अन्त्येष्टि पनि गाउँमै गरिएसंगै नेपालमा कोरोनाको कारण मृत्यु हुनेको संख्या ६ पुगेको छ ।
तपाईँको अभिमत