कोरोनाविरुद्ध खोप निर्माणको पहिलो चरणमा चीनलाई सफलता
सांकेतिक तस्बिर।
जगन्नाथ ढकाल- जेष्ठ १०, २०७७ १३:३८ मा प्रकाशित
अ +
अ -
लन्डन । कोरोना भाइरस (कोभिड–१९) विरुद्ध खोप निर्माणको पहिलो चरणमा चीनलाई सफलता हात परेको छ । पहिलो चरणको परीक्षण सफल भएको शुक्रबार द लेन्सेट नामक मेडिकल जर्नलले प्रकाशित गरेको हो ।
उक्त खोप सुरक्षित, सहन सकिने साथै मानव शरीरमा सार्स–कोभ–२ विरुद्ध प्रतिरोधात्मक क्षमता निर्माण गर्ने देखिएको हो । १ सय २८ वयस्क स्वस्थ मानिसमा गरिएको परीक्षणको नतिजा २८ दिनपछि प्राप्त भएको हो । यसले काम गर्ने वा नगर्ने अबको ६ महिनापछि थाहा हुनेछ । यसका लागि अन्य परीक्षण गर्न जरुरी रहेको लेन्सेट जर्नलले बताएको छ ।
यो सफलता कोसेढुङ्गा सावित हुने बेइजिङ इन्स्टिच्यूट अफ बायोटेक्नोलोजीका प्राध्यापक वेइ चेनले बताउनुभयो । ‘यी नतिजाले एक कोसेढुङ्गा प्रस्तुत गर्छन्’, उनले भने, ‘यसले आउँदा दिनमा अनुसन्धानकर्तालाई बल पुर्याउने छ ।’
यद्दपि अहिले नै यही खोपले कोभिड–१९ बाट बचाउन सक्छ भन्न नमिल्ने प्राध्यापक चेनले बताउनुभयो । ‘कोभिड–१९ पुरानैको निरन्तरता होइन । चुनौतीहरू धेरै छन् । अहिले नै यसले कोभिड–१९ बाट मानिसलाई बचाउन सकिन्छ भन्न मिल्दैन ।’ यसैगरी उनले सबैका लागि खोप उपलब्ध हुन अझै लामो समय लाग्ने बताएका छन् ।
गत डिसेम्बर अन्तिमदेखि चीनको वुहानबाट फैलिएको कोभिड–१९ बाट हालसम्म ५२ लाख १३ हजार ९९१ संक्रमित भइसकेका छन् । जसमध्ये ३ लाख ३८ हजार २४९ ले ज्यान गुमाएका छन् भने २० लाख ५८ हजार ५८१ जना निको भएका छन् ।
तपाईँको अभिमत