कोरोना कनेक्सन : कपिलवस्तुदेखि शिक्षण अस्पताल हुँदै सिन्धुपाल्चोकसम्म ?

आज कपिलवस्तुमा कोरोना पुष्टि भएकी बालिका शिक्षण अस्पतालमा उपचाररत संक्रमित बालिकाको साथी

काठमाडौं । कपिलवस्तुमा आज कोरोना भाइरस रोगको पुष्टि भएकी बालिका  शिक्षण अस्पतालमा उपचाररत संक्रमित बालिकाको साथी रहेको खुलेको छ । कपिलवस्तु वाणगंगा न.पा., मायादेवी गाउँपालिकामा आज पुष्टि भएको ९ जनामध्ये ८ वर्षकी बालिका शिक्षण अस्पतालमा उपचाररत बालिकाका साथी रहेकी हुन् ।

कपिलवस्तु कोभिड व्यवस्थापन फोकल पर्सन कुमार थापाका अनुसार आज थपिएको ८ वर्षकी संक्रमित बालिका शिक्षण अस्पतालमा उपचारत ६ वर्षकी बालिकाको छिमेकी साथी हो । उहाँले भन्नुभयो,बालिकाको सम्पर्कमा आएका परिवार तथा छिमेकीका ५८ जनाको स्वाब संकलन गरी परीक्षण गरिएका मध्ये ३४ जनाको रिपोर्ट आउदा एक बालिकामा कोरोना पोजेटिभ देखियो बालिकाको परिवारका ४ जना आमा, हजुरआमा र हजुरबुवा, आन्टीको रिपोर्ट नेगेटिभ आइसकेको छ अब अंकलको रिपोर्ट आउन बाँकी छ ।

बालिकाको सम्पर्कमा आएकामध्ये अब २४ जनाको रिपोर्ट आउन बाँकी छ । शिक्षण अस्पतालमा उपचाररत ६ वर्षकी बालिकामा जेठ १ गते कोरोना पोजेटिभ देखिएको थियो । बालिका अहिले शिक्षण अस्पताल आइसोलेसनमा छिन् । बालिकाको साथमा आमा र हजरबुबा रहेका छन् ।

के शिक्षण अस्पतालमा उपचाररत बालिकालाई कपिलवस्तु छँदा नै संक्रमण भएको थियो त ?

शिक्षण अस्पतालमा उपचार भइरहदा बालिकालाई कसरी संक्रमण भयो भन्ने आशंका रहिरहेका बेला संक्रमित बालिकाकोसँगै खेल्ने साथीलाई आज संक्रमण पुष्टि हुनुले बालिका कपिलवस्तुबाटै संक्रमित भई काठमाडौं आएको हुनसक्ने अनुमानलाई पुष्टि गर्न मद्धत पुग्दछ । संक्रमित बालिकासँगै अस्पतालमा रहेका आमा र हजुबुवाको रिपोर्ट नेगेटिभ आइसकेको छ ।

बालिकालाई २४ गते घाँटीको शल्यक्रियाका लागि शिक्षण अस्पताल ल्याइएको थियो । यद्यपी बालिकाको कन्ट्याक्ट ट्रेसिङमा रहेका २४ जनाको रिपोर्ट आउन बाँकी रहेकाले यसमा रहेको अन्यौललाई थप प्रस्ट पार्ने आशा गर्न सकिन्छ ।

सुत्केरी महिलालाई कहाँबाट भयो संक्रमण ?

कोरोना संक्रमणका कारण मृत्यु भएकी सिन्धुपाल्चोककी २९ वर्षीया महिला पनि शिक्षण अस्पतालमा सुत्केरी भई घर गएकी थिइन् । २४ गते नर्मल डेलिभरी भई २५ गते डिस्चार्ज भएकी उनको जेठ ३ गते श्वासप्रश्वासमा समस्या आई अवस्था जटिल भएपछि उपचारका लागि धुलिखेल अस्पताल ल्याउदै गर्दा मृत्यु भएको थियो ।

महिला २३ गते शिक्षण अस्पताल भर्ना हुनुभएकी महिला २५ गतेसम्म अस्पतालमा नै हुनुन्थ्यो । मृतकका श्रीमानले  उनमा अस्पतालबाटै कोरोना संक्रमण भएको आश‌का गरेका थिए।  हाल अस्पतालमा उपचाररत बालिकाको साथीलाई कपिलवस्तुमा नै कोरोना पुष्टि हुनु कतै ती बकालिका हुँदै सुत्कीरी महिलामा त संक्रमण भएन भन्ने तथ्यलाई बल पुगेको देखिन्छ।

कन्ट्याक्ट ट्रेसिङको काम भइरहेको बताइरहेको सरकारले यस विषयमा अनुसन्धान गरेर थप विवरण बाहिर ल्याउने आशा राखौ ।

कपिलवस्तुमा २ पत्रकारलाई कोरोना पुष्टि

 आजै कपिलवस्तुमा कोरोना पुष्टि भएकामध्ये २ जना पुरुष पत्रकार रहेको पनि उहाँले बताउनुभयो । मायादेवी गाउँपालिकाकै २४ र २७ वर्षका पुरुष स्थानिय पत्रकार रहेका हुन् । संक्रमित बालिका र पत्रकारलाई कोरोना विशेष अस्पताल दाङ पठाउने तयारी भइरहेको फोकल पर्सन थापाले जानकारी दिनुभयो ।