कर्मचारीको रिपोर्ट नेगेटिभ आएपछि निदान अस्पताल सञ्चालनमा
काठमाडौं । पुल्चोकस्थित आरोग्य फाउण्डेशनमा कार्यरत एक महिला कर्मचारीलाई कोरोना संक्रमण पाइएपछि बुधबार देखि सिल गरिएको निदान अस्पताल बिहीबार साँझबाट सञ्चालनमा आएको छ । आरोग्य फाउण्डेशमा कार्यरत एम्बुलेन्स चालक र अर्का एक कर्मचारीको कोरोना रिपोर्ट नेगेटिभ आएसंगै अस्पताल सञ्चालन गरिएको हो । ती दुई कर्मचारीलाई पाटन अस्पतालको आइसोलेशनमा राखिएको थियो ।
निदान अस्पतालका प्रमुख कार्यकारी अधिकृत विपीन प्रधानले कोरोना भाइरस संक्रमितको सम्पर्कमा पुगेका दुई जना कर्मचारीका कोरोना रिपोर्ट नेगेटिभ आएको बताउनुभयो । उहाँले रिपोर्ट नेगेटिभ आएपछि जिल्ला जनस्वास्थ्य र जिल्ला प्रशासन कार्यालयबाट अस्पताल सञ्चालन गर्न अनुमति दिएको बताउनुभयो । प्रधानले रिपोर्ट नेगेटिभ आएपछि बिहीबार साँझदेखि अस्पताल सुचारु गरिएको बताउनुभयो । उहाँले जिल्ला जनस्वास्थ्य कार्यालय ललितपुरबाट अस्पताल सुचारु गर्न आग्रह गरेको बताउनुभयो ।
बुधबार आरोग्य फाउन्डेशनमा कार्यरत एक जना सहकर्मीलाई कोरोना पोजेटिभ देखिएपछि आरोग्य फाउण्डेशनका दुई कर्मचारीलाई आइसोलेसनमा राखेर पिसिआर परिक्षण गरिएको थियो । कोरोना परीक्षण गराउन टेकु लैजाने र ल्याउने कार्य गरेका आरोग्यकै एम्बुलेन्स चालक र अर्का एक कर्मचारीलाई आइसोलेसनमा राखेर पीसीआर परीक्षणका लागि नमूना लिइएको थियो । जनस्वास्थ्य कार्यालय ललितपुर र स्थानीय प्रशासनले संक्रमण फैलिएको हुनसक्ने भन्दै फाउण्डेशन र अस्पताललाई शिल गरेको थियो । संक्रमित युवती कर्मचारी फाउण्डेशनमा काम गर्न नआएपनि उहाँलाई भक्तपुरस्थित डेराबाट टेकु र टेकुबाट डेरा पुरयाउन आरोग्यको एम्बुलेन्स प्रयोग भएको थियो ।
तपाईँको अभिमत