कर्णालीको जुम्लामा दुई दिनमा ८६३ कोरोना परीक्षण, सबैको रिपोर्ट नेगेटिभ

काठमाडौं । कर्णाली प्रदेशको जुम्लामा पिसिआर मार्फत कोरोना भाइरस रोगको परीक्षण गरिएका सबैको रिपोर्ट नेगेटिभ आएको छ । कर्णाली स्वास्थ्य विज्ञान प्रतिष्ठानको प्रयोगशाला जुम्लामा मंगलबार ८४७ र आज बुधबार १६ जनाको थ्रोट स्वाब परीक्षण गरियो जसमा सबैको रिपोर्ट नेगेटिभ आएको अस्पताल निर्देशक डा.मंगल रावलले जानकारी दिनुभयो । 

धेरै जनाको परीक्षण गर्नपर्ने भएकाले पुल टेस्ट गरिएको भन्दै रावलले भन्नुभयो ५ जनाको नमुना मिसाएर परीक्षण गरेका थियौ । बैशाख २२ मा ८,२४ मा २४ र २६ मा ४४ जनाको स्वाब परीक्षण भएको थियो ती सबैको रिपोर्ट यसअघि नै नेगेटिभ आइसकेको छ । जुम्लामा एकैदिन बैशाख २९ गते ८ वटा गाविसबाट एकैदिन ८४९ जनाको नाक र घाँटी भित्रबाट र्याल (स्वाब) संकलन गरिएको थियो । 

कर्णाली स्वास्थ्य विज्ञान प्रतिष्ठान र जिल्ला जनस्वास्थ्य कार्यालयको संयुक्त टोलिले जुम्लाका विभिन्न ८ वटा गाविसका गाउँगाउँ पुगेर ८४९ जनाको स्वाब संकलन गरेको थियो । 

हालसम्म सात प्रदेश मध्ये कर्णाली प्रदेशमा एक जनालाई पनि कोरोना संक्रमण देखिएको छैन । कर्णालीका स्थानिय प्रशासन,चिकित्सक,नर्स,प्रयोगशालाकर्मी लगायत सम्पूर्ण स्वास्थ्यकर्मी सुरु देखि नै कोरोना विरुद्धको अभियानमा सक्रिय भएर लागेका छन् ।