२४ घण्टामा २ हजार ३५७ पिसिआर परीक्षण,२४५ आइसोलेसनमा 

काठमाडौं । पछिल्लो २४ घण्टामा २ हजार ३५७ जनाको पिसिआर मार्फत कोरोना भाइरस रोगको परीक्षण भएको छ । यो संगै पिसिआर मार्फत परीक्षण हुनेको संख्या २१ हजार ३४० रहेको छ । र्यापिड डायग्नोष्टिक(आरडिटि)बाट हालसम्म ६० हजार ३१९ जनाको परीक्षण भएको छ । 

स्वास्थ्य तथा जनसंख्या मन्त्रालयको नियमित प्रेस ब्रिफिङमा प्रवक्ता डा. विकास देवकोटाले दिउसो ४ बजेसम्म २ जनामा कोरोना पुष्टि भएको जानकारी दिदै संक्रमित मध्ये एक जना बाँकेका ३६ वर्षका पुरुष र अर्का एक कपिलवस्तुका २२ वर्षका पुरुष रहेको जानकारी दिनुभयो । काठमाडौंमा ६ र बाहिर २३९ गरि देशभर २४५ जना आइसोलेसनमा बसिरहेको भन्दै उहाँले आइसोलेसनमा रहेका मध्ये कोरोना पुष्टि भएका र शंकास्पद दुवै खालका व्यक्तिहरु रहेको जानकारी दिनुभयो । 

हालसम्म १७६ महिला र ४३ जना पुरुषमा कोरोना पोजेटिभ देखिएको छ ।  प्रदेश नम्वर १ मा ३५,प्रदेश नम्वर २ मा ९६,बागमती प्रदेशमा ९,गण्डकी प्रदेशमा २,प्रदेश नम्वर ५ मा ७२ र सुदुरपश्चिममा ५ जनालाई कोरोना पुष्टि भइसकेको छ । आज भरतपुर र बुटवलका एक÷एक जना बिरामी डिस्चार्ज भएपछि निको हुनेको संख्या ३५ पुगेको छ । 

पीपीई पर्याप्त छ,सुरक्षा अपनाएर काम गरौ
प्रवक्ता देवकोटाले नेपालमा पनि स्वास्थ्यकर्मीलाई कोरोना संक्रमणको पुष्टि भइसकेकाले अग्र स्थानमा रहेर परीक्षण र उपचारमा खटिने चिकित्सक,नर्स,प्रयोगशालाकर्मी लगायत सम्पूर्ण स्वास्थ्यकर्मीलाई व्यक्तिगत सुरक्षा कवच प्रयोग गर्न आग्रह गर्नुभयो । 
उहाँले पीपीई पहिलाको जस्तो अभाव नभएकाले संक्रामक रोगको नियन्त्रणको सावधानी अपनाएर कोरोनाको परीक्षण र उपचारमा लाग्न उहाँले आग्रह गर्नुभयो ।