नेपालमै पहिलो पटक एकैदिन जुम्लामा भयो धेरैको स्वाब संकलन

काठमाडौं,२९ बैशाख । पिसिआर विधिबाट कोरोना भाइरस रोगको परीक्षण गर्न जुम्लाका ८ वटा गाविसबाट एकैदिन ८४९ जनाको नाक र घाँटी भित्रबाट र्याल (स्वाब) संकलन गरिएको छ । नेपालमा नै एकैदिन यति धेरैको स्वाब संकलन पहिलो पटक जुम्लामा भएको हो । 

कर्णाली स्वास्थ्य विज्ञान प्रतिष्ठान र जिल्ला जनस्वास्थ्य कार्यालयको संयुक्त टोलिले जुम्लाका विभिन्न ८ वटा गाविसका ८४९ जनाको स्वाब संकलन गरिएको प्रतिष्ठान अस्पताल निर्देशक डा. मंगल रावलले जानकारी दिनुभयो । 

स्वाब संकलनमा प्रतिष्ठान र जनस्वास्थ्य कार्यालयका २४ जना प्रयोगशालाकर्मीको सहभगिता रहेको र भोलिबाट पुल टेस्ट गरिने उहाँले बताउनुभयो । पुल टेस्टमा १० जनाको नमुनालाई एकै ठाउँमा मिसाएर परीक्षण गरिन्छ,हामी ५ जनाको नमुना मिसाएर गर्दैछौं,२ दिनमा सबै जनाको परीक्षण हुन्छ निर्देशक रावलले भन्नुभयो धेरै जनाको परीक्षण गर्नुपर्दा पुल टेस्ट गरिन्छ । 

यसअघि जुम्लामा ३२४ जनाको स्वाब संकलन गरि राष्ट्रिय जनास्वास्थ्य प्रयोगशाला काठमाडौं ल्याइएको थियो । जुम्लामा पहिलो पटक १०४ वटा नमुना परीक्षण भएको थियो । यसअघि गरिएका सबैको रिपोर्ट नेगेटिभ आइसकेको छ । 

हालसम्म कर्णालीमा एक जनालाई पनि कोरोना संक्रमण देखिएको छैन । कर्णालीका स्थानिय प्रशासन,चिकित्सक,नर्स,प्रयोगशालाकर्मी लगायत सम्पूर्ण स्वास्थ्यकर्मी सुरु देखि नै कोरोना विरुद्धको अभियानमा सक्रिय भएर लागेका छन् ।