आफूलाई बचाउन कया‌ैं लिटर अक्सिजन दिइएको प्रधानमन्त्री बोरिसद्वारा खुलासा

काठमाडौं, २१ बैशाख । बेलायतका प्रधानमन्त्री बोरिस जोनसनले कोरोना भाइरस रोगबाट बचाउन आफूलाई कैयाैँ लिटर अक्सिजन दिएको खुलासा गर्नुभएको छ । यसअघि प्रधानमन्त्री बोरिसलाई संक्रमण भएर आइसीयूमा राख्दा पनि अवस्था सामान्य रहेको बताइएको थियो । दि सन पत्रिकासँगको अन्तवार्तामा उहाँले आफू संक्रमणबाट ग्रस्त हुँदा केही दिन स्वास्थ्यमा निकै खराबी आएको बताउँदै अस्पतालमा रहेको समस्यालाई नजिकबाट नियाँल्ने मौका पाएको बताउनुभएको छ ।

अस्पतालमा चिकित्सक, नर्स तथा स्वास्थ्यकर्मीहरुको योगदानको प्रशंसा गर्दै उहाँले उनीहरुकै विशेष हेरचाहले आफू निको भएको बताउनुभयो । मार्च २६ मा प्रधानमन्त्री बोरिसलाई कोरोना संक्रमणको पुष्टि भएको थियो । त्यसपछि सेन्ट थोमस अस्पतालमा भर्ना गरिएको थियो । अहिले प्रधानमन्त्री बोरिस निको भएर आफ्नो काममा फर्किसक्नु भएको छ । यसैबीच उहाँले आफूलाई कोरोनाबाट जोगाएका दुई डाक्टरहरुको नामबाट आफ्नो छोराको नाम राख्नुभएको छ ।

उहाँ र उहाँकी श्रीमती केरी साइमन्सले डाक्टर निक प्राइस र निक हार्टको नामबाट विल्फेड लोरी निकोलस जोन्सन नाम राख्नुभएको छ । छोराको पहिलो नाम प्रधानमन्त्रीको हजुरबुवाको नामबाट, दोस्रो नाम आफ्नै हजुरबुवा र बीचको नाम निकोलस, डाक्टर निक प्राइस र डाक्टर निक हार्टको नामबाट राखिएको बीबीसीले जनाएको छ । छोराको नाम आफ्नो हजुरबुवा–हजुरआमा र बोरिसलाई उपचार गर्ने डाक्टरलाई सम्मान दिनका लागि राखिएको हो । कोरोनाबाट निको भई घर फर्कनुभएपछि प्रधानमन्त्री बोरिस बाबु बन्नुभएको थियो ।