कोरियामा कोरोनाकाे स्थानिय संक्रमण शुन्य, बुद्ध जयन्ति मनाउने तयारी

काठमाडौं,१८ बैशाख । दक्षिण कोरियामा स्थानिय कोरोना भाइरस रोगको संक्रमण शुन्यमा झरेको छ । यद्यपी आयातित नयाँ संक्रमण भने ४ जनामा देखिएको अन्तराष्ट्रिय सञ्चार माध्यमहरुले जनाएका छन् । कोरियाका स्वास्थ्य अधिकारीहरुले कोरोनाको महामारी सुरु भएयता पहिलो पटक स्थानिय संक्रमण शुन्य देखिएको जानकारी दिएका छन् । संक्रमण फैलिएको ७५ दिनमा स्थानिय संक्रमण नियन्त्रणमा आएको रोग नियन्त्रण तथा रोकथाम केन्द्रले जनाएको छ । कोरियामा जनवरी २० पहिलो पटक कोरोना संक्रमण देखिएको थियो । चिनियाँ नागरिकबाट संक्रमण फैलदा फेब्रुअरी २९ सम्म आइपुग्दा संक्रमणले उच्च रुप लिएको थियो ।

७५ दिन अघि कोरोनाको संक्रमण तिब्र गतिमा फैलदा संक्रमणका कारण २ सय ४७ जनाको मृत्यु भयो भने १० हजार ७ सय ६५ जनामा कोरोना संक्रमणको पुष्टि भएको छ । चर्चबाट फैलिएको कोरोना संक्रमणले थेगुं र चेङदु अतिप्रभावित भएको थियो । कोरिया संक्रमण नियन्त्रणका लागि सक्रमण देखिएका क्षेत्रलाई पूर्ण रुपमा सिल गरि लकडाउन गरेर क्वारेन्टाइन,परीक्षण ,आइसोलेसन र उपचार मोडलबाट अघि बढेको थियो ।

यसैबीच दक्षिण कोरियालीहरुले बुद्धको जन्मदिन मनाउने तयारी गरेका छन् । बैशाख २५ अर्थात मे ७ मा पर्ने बुद्ध जयन्ति मनाउने  तयारी स्वरुप केन्द्रिय सियोलको जग्गे मन्दिरमा बुधबार सुरक्षात्मक मास्क लगाएर अनुयायीहरु भेला भएका थिए ।