नेपालको क्रसरमा काम गर्ने २ भारतीय कामदारमा कोरोना पोजेटिभ

गुलरिया, १३ बैशाख । नेपालबाट भारत गएका दुई भारतीय नागरिकलाई कोरोना पोजेटिभ देखिएको छ । भारतको उत्तरप्रदेश राज्यकाे बहराइच जिल्ला नानपाराका निवासी दुई भारतीय मजदुरमा कोरोना पोजेटिभ देखिएको हो ।

उहाँहरुलाई भारतमै परीक्षण गर्दा कोरोना पोजेटिभ देखिएको भारतीय प्रहरी अधिकारीले पत्र पठाएर जानकारी दिएको बर्दियाका प्रमुख जिल्ला अधिकारी प्रेमलाल लामिछानेले जानकारी दिनुभयो । पत्रमा उल्लेख गरिए अनुसार बैशाख ५ गते (अप्रिल १७) मा उहाँहरु भारत स्थित आफ्नो घर पुगेका थिए । कोठियाघाट क्षेत्रमा कामगर्ने मजदुरहरुमा कोरोना पोजेटिभ भेटिएकाले उहाँहरुको सम्पर्कमा रहेकाहरुको बारेमा जानकारी लिन आवश्यक कदम  चलाउन भारतीय अधिकारीबाट नेपाललाई अनुरोध गरिएको छ ।

बर्दियाको कर्णाली (गेरुवा) नदीस्थित कोठियाघाटमा सञ्चालित क्रसरमा उहाँहरु काम गर्दै आउनुभएको थियो । लकडाउनका समयमा केही दिनअघि भारतस्थित आफ्नो घर पुगेका थिए । परीक्षणका क्रममा बैशाख ८ गते पोजेटिभ भेटिएपछि भारतीय अधिकारीहरुले नेपाली सुरक्षा अधिकारीहरुलाई सोही दिन पत्राचार गरी जानकारी गराएको प्रजिअ लामिछानेले बताउनुभयो ।  
    

प्रजिअ लामिछानेका अनुसार नेपाली उद्योगमा कार्यरत भारतीयमा कोरोना पोजेटिभ भेटिएपछि बर्दियास्थित कोठियाघाट क्षेत्रलाई सिल गरिएको छ । ‘क्रसर धेरै अघिदेखि नै बन्द अवस्थामा छ।’ उहाँले भन्नुभयो–कामदारहरुलाई नेपालमै वा भारत जाने क्रममा संक्रमण भएको भन्नेबारे अनुसन्धान भइरहेको छ ।’ संक्रमण देखिएका भारतीय कामदारसँगै काम गर्ने नेपाली मजदुरको पहिचान गरी स्वाब परीक्षणका लागि पठाइएको तर रिपोर्ट आउन बाँकी रहेको उहाँले बताउनुभयो । 

बर्दियामा भाइरस ट्रान्सफर मिडियम (भीटीएम) नहुँदा अन्य कामदारको स्वाब संकलनमा समस्या देखिएको छ । 
 

   भारतीय अधिकारीको पत्र