स्वास्थ्यकर्मीलाई दुर्व्यवहार गर्नेलाई ७ वर्ष जेल सजाय 

काठमाडौं,१० बैशाख । भारत सरकारले कोरोना विरुद्धको अभियानमा लागिरहेका स्वास्थ्यकर्मीमाथि दुर्व्यवहार बढेपछि यसलाई रोक्न नयाँ अध्यादेश ल्याएको छ । मन्त्रिपरिषद्को बैठकबाट सरकारले महामारी रोग कानून १८९७ लाई परिवर्तन गरि नयाँ अध्यादेश लागू गर्ने निर्णय गरेको हो । अब राष्ट्रपतिले प्रमाणिकरण गरेपछि अध्यादेश कार्यान्वयनमा आउनेछ । 

अध्यादेश कार्यान्वयन भएपछि डाक्टर, स्वास्थ्यकर्मीमाथि दुर्व्यवहार तथा आक्रमण गरेमा ३ महिनादेखि ७ वर्षसम्मको जेल सजाय तथा दुईदेखि पाँच लाख जरीवाना हुन सक्नेछ । डाक्टर, नर्स, प्राविधिक, स्वास्थ्यकर्मी,पारामेडिक्स लगायतका स्वास्थ्यकर्मीलाई दुव्र्यवहारका घटना बढेपछि सरकारले यसलाई रोक्न नयाँ अध्यादेश ल्याएको हो । 

दुर्व्यवहारका घटनाका बारेमा प्रहरीले ३० दिन भित्र अनुसन्धान गर्नुपर्नेछ भने एक वर्षभित्र फैसला गर्नुपर्नेछ । डाक्टर तथा स्वास्थ्यकर्मीहरुको गाडी,क्लिनिक,सामान तोडफोड भएमा तोडफोडमा संलग्नले वास्तविक लागतको दुई गुणा असुल गर्नुपर्नेछ । 

अध्यादेश पास गर्नुअघि महामारी विरुद्ध लडिरहेका डाक्टर तथा स्वास्थ्यकर्मीमाथि हुने आक्रमणलाई कुनै पनि हालतमा स्वीकार गर्न नसक्ने बताउनुभएका सूचना प्रसारण मन्त्री प्रकाश जावडेकरले यो अध्यादेश लागूभएपछि डाक्टर तथा स्वास्थ्यकर्मीलाई आक्रमण गर्नेलाई कडा कार्वाही हुने बताउनुभयो । भारतमा हालसम्म कोरोना संक्रमणका कारण ६ सय ५२ जनाको मृत्यु भएको छ भने २० हजार ४ सय ७१ जनामा संक्रमण पुष्टि भएको छ ।