डाक्टरमाथिको दुर्व्यवहारले निम्त्याएको परिस्थिति, काे जिम्मेवार ?

काठमाडौं, ४ बैशाख । देश अहिले कोरोना भाइरस रोग नियन्त्रणको अभियानमा जोडबलका रुपमा लागिरहेको छ । २४ दिनदेखि लकडाउनमा छ सबै जना घरभित्र छन् । संक्रमण बढिरहेकाले घर बाहिर ननिस्कन प्रहरीले आग्रह गरिरहेका छन् । लकडाउन उल्लंघन हुन नदिन थप कडाइ गरेको छ । बुधबार राती लकडाउनको समयमा सडकमा हिँड्दा विवाद भएपछि प्रहरीले शिक्षण अस्पतालका ३ आवासिय डाक्टरलाई लाठी प्रहार गरेको घटना बाहिर आएको छ । आवासीय चिकित्सक डा.शम्भु खनाल, डा.तेजप्रकाश साह र डा.विकास साहलाई कान्ति बाल अस्पतालको ओरोलो नजिकै प्रहरीले लाठी प्रहार गरेको थियो ।

विवाद भएपछि सामान्य बल प्रयोग भएको हो : डिएसपी लम्साल

महाराजगञ्जका प्रहरी नायब उपरीक्षक उमेश लम्सालका अनुसार बुधबार राती ८ बजेतिर तीन जना सडकमा हल्ला गर्दै आउनुभएको रहेछ सुरक्षामा खटिएका प्रहरी जवानले लकडाउनमा यसो गर्न मनाही छ भनी सोधपुछ गर्दा विवाद भएको र सामान्य बल प्रयोग भएछ यस विषयमा छानबिन शुरु भइसकेको छ । पछि थाहा भयो उहाँहरु शिक्षण अस्पतालका डाक्टरहरु हुनुहुँदो रहेछ ।

यो सडकमा भएको घटना हो अस्पताल परिसरमा भएको होइन । लकडाउनको समयमा सडकमा भएको घटनालाई प्रहरीले डाक्टरमाथि ज्यादती गर्यो भनेर आरोप लगाइहाल्न मिल्दैन । डाक्टरहरु पनि टाढैबाट चिनिने गरि हिँड्नुभएको भए सुरक्षामा खटिएकालाई सहज हुने थियो । दुबैले संयमता अपनाउन जरुरी छ ।

चिकित्सकलाई लाठी हान्नेलाई कडा कार्वाही हुनुपर्छ : डा.पाण्डे

सरकारी चिकित्सक संघ (गोदान)का अध्यक्ष डा. दिपेन्द्र पाण्डेले सरकारले स्वास्थ्यकर्मीको सुरक्षाको प्रत्याभूति गर्छु भन्ने अनि डाक्टरलाई कार्ड देखाउँदा देखाउँदै कुटपिट गर्नु खेदजनक रहेको बताउनुभयो । उहाँले भन्नुभयो, सुरक्षामा खटेका सुरक्षाकर्मीले जो कसैलाई पनि कुटपिट गर्न पाउँदैन त्यसमा पनि बिरामीको उपचार गरि घर फर्कने क्रममा परिचय बताउँदा बताउँदै लाठी हान्नु खेदजनक छ । घटनामा संलग्नलाई कडाभन्दा कडा कार्वाही हुनुपर्छ । डाक्टरलाई कुटपिट गरेको भन्दै चिकित्सक सम्मिलित विभिन्न संघसंस्थाहरुले विरोध जनाएका छन् । उनीहरुले दोषीलाई कडा कार्वाहीको माग गरेका छन् ।

चिकित्सक सम्मिलित संघसंस्थाद्वारा घटनाको भर्त्सना
डाक्टरलाई कुटपिट गरेको भन्दै चिकित्सक सम्मिलित विभिन्न संघसंस्थाहरुले विरोध जनाएका छन् । नेपाल चिकित्सक संघ, शिक्षण अस्पताल आवासिय चिकित्सक संघ, न्याम्सका आवासिय चिकित्सकहरुले विज्ञप्ति निकालेर दोषीलाई कडा कार्वाहीको माग गरेका छन् ।

घटना छानबिनका लागि प्रहरीद्वारा समिति गठन

प्रहरी वरिष्ठ उपरीक्षक (एसएसपी ) किरण बज्राचार्यको नेतृत्वमा महानगरीय अपराध अनुसन्धान महाशाखा, टेकुका प्रहरी उपरीक्षक (एसपी) मुकेश सिंह र महानगरीय प्रहरी परिसर, काठमाडौंका प्रहरी नायब उपरीक्षक (डीएसपी) होविन्द्र बोगटी सदस्य रहेको छानबिन समिति गठन भएको छ ।

महामारी नियन्त्रणमा सबै जिम्मेवार

कोरोना नियन्त्रणमा चिकित्सक, स्वास्थ्यकर्मी सुरक्षाकर्मी, सञ्चारकर्मी, कर्मचारी, अत्यावश्यक सेवा आपूर्तिमा खटिएका व्यक्तिहरु तथा आम नागरिक सबैको भूमिका महत्वपूर्ण छ । चिकित्सक तथा स्वास्थ्यकर्मीहरु ज्यानको प्रवाह नगरि रातदिन कोरोनाको उपचारमा खटिरहेका छन् । सुरक्षाकर्मीहरु पनि ज्यान जोखिमै राखी अहोरात्र सुरक्षाका लागि सडक–सडक, गल्ली गल्लीमा खटिरहेका छन् ।

देश नै ठप्प रहेको अवस्थामा अत्यावश्यक सेवा प्रदायकहरु खाद्यन्न, तरकारी, दुध, पानीको ढुवानीमा लागिरहेका छन् र कर्मचारीहरु आ–आफ्नो स्थानबाट खटिरहेका छन् । महामारी नियन्त्रणका लागि सबैले आ–आफ्नो क्षेत्रबाट सहयोग गरिरहेका छन् । आज विश्व नै एक भएर कोरोनाको विरुद्ध लडिरहेको अवस्थामा एकाध घटनालाई लिएर आफ्नो व्यक्तिगत स्वार्थका लागि वा राजनीतिक रोटी सेकाउने काममा कोही कसैले लाग्नु स्वयम् उसैलाई पनि घातक साबित हुन सक्दछ ।  

घटनाको निष्पक्ष छानबिन गरि सत्यतथ्य पत्ता लगाउनु पर्दछ । दोषीमाथि कार्वाही हुनुपर्छ तर अहिलेको कठिन घडीमा एउटा घटनालाई केन्द्रविन्दु बनाई विरोध गरिरहँदा अत्यावश्यक स्वास्थ्य सेवामा समेत प्रभाव पर्नसक्छ दिनरात सेवामा खटिने प्रहरीको पनि मनोबल गिर्छ आम जनमानसलाई मानसिक रुपमा असर पर्न सक्छ । त्यसैले सकेसम्म छिटो छलफलको माध्यमबाट यो घटनालाई टुंग्याउनुपर्दछ । यसै घटनालाई लिएर पेशागत मर्यादा र कर्तव्यप्रति आँच आउन दिन हुँदैन ।

भविष्यमा यस्तो घटना दोहोरिन नदिन सबै आ–आफ्नो स्थानबाट लाग्नुपर्दछ,सचेत एवं संयमित हुन जरुरी छ । सारा विश्व नै एकजुट भई सबैको साझा दुश्मन कोरोना भाइरस विरुद्ध लडिरहेको अवस्थामा संयमित भइ आफ्नो कर्तव्य पुरा गर्न जरुरी छ । कोरोनाको लडाँइ जित्न फुटेर होइन जुटेर, आफू–आफू लडेर होइन राष्ट्र नै एकजुट भई लाग्नु पर्दछ ।