७ दिनसम्म अवस्था स्थिर, थप व्यक्तिमा संक्रमण देखिएन 

काठमाडौं, २९ चैत । नेपालमा पछिल्लो एक सातादेखि कोरोना संक्रमणको अवस्था स्थिर रहेको छ । शनिबार यता नयाँ व्यक्तिमा संक्रमण देखिएको छैन । पछिल्लो २४ घण्टामा देशभर ८ सय ९७ जनाको नमुना परीक्षण गरिएकोमा सबैको रिपोर्ट नेगेटिभ आएको छ । स्वास्थ्य तथा जनसंख्या मन्त्रालयद्वारा आयोजित नियमित मिडिया ब्रिफिङ कार्यक्रममा प्रवक्ता डा.विकास देवकोटाले दिनहुँ परीक्षणको संख्या बढिरहेको र सात दिन यता गरिएको परीक्षणमा सबैको रिपोर्ट नेगेटिभ आएको बताउनुभयो । 

उहाँले पछिल्लो ७ दिनमा गरिएका २ हजार ६ सय ३० वटा नमुना परीक्षणमा सबैको रिपोर्ट नेगेटिभ आएको जानकारी दिनुभयो । प्रवक्ता देवकोटाका अनुसार देशभर हालसम्म ४ हजार ४ सय २६ जनाको नमुना परीक्षण भएको छ ।  अहिले देशभर ८२ जना आइसोलेसनमा रहेका छन् । जसमा काठमाडौंमा १५ र बाहिर ६७ जना छन् । प्रवक्ता देवकोटाले सुदूरपश्चिमका सबै जिल्लाहरुमा र्यापिड टेस्ट किटबाट परीक्षण सुरु भइसकेको बताउनुभयो ।  उहाँले आज देशभर ८ हजार ८२ जना मानिस क्वारेन्टाइनमा बसिरहेको जानकारी दिनुभयो । 

वीर अस्पतालमा पनि नमुना परीक्षण सुरु भएको छ । भोलिदेखि सरुवा रोग अस्पताल टेकूमा पनि परीक्षण सुरु हुने जानकारी प्रवक्ता देवकोटाले दिनुभयो । उपत्यका बाहिर कोसी अस्पताल विराटनगर, बी.पी कोइराला स्वास्थ्य विज्ञान प्रतिष्ठान धरान, जनकपुर प्रादेशिक अस्पताल, पोखरा स्वास्थ्य विज्ञान प्रतिष्ठान, सुर्खेत प्रादेशिक अस्पताल, सेती प्रादेशिक अस्पताल धनगढी, हेटौडा, भैरहवा र चितवनबाट नमुना परीक्षण भइरहेको छ । 

पछिल्लो २४ घण्टामा उपत्यका बाहिर २ सय २८ जनाको नमुना परीक्षण भयो भने राष्ट्रिय जनस्वास्थ्य प्रयोगशालामा ६ सय ९ जनाको परीक्षण भएको छ ।