पीपीई र स्वास्थ्य सामग्री बोकेर रुकुम पुग्नुभयो नेता जनार्दन शर्मा

रुकुम, २६ चैत । नेकपाका नेता तथा पूर्व गृहमन्त्री जनार्दन शर्मा कोरोना उपचारका लागि अत्यावश्यक पर्ने व्यक्तिगत सुरक्षाका सामग्री (पीपीई) सहित स्वास्थ्य सामग्री लिएर रुकुम आउनुभएको छ । स्वास्थ्यकर्मीले प्रयोग गर्ने ६० थान पीपीई सेट, ७ सय २० वटा स्यानिटाइजर, ३२ थान थर्मलगन, दुई हजार थान पञ्जा र ३० थान एन नाइन्टी फाइभ मास्क लिएर शर्मा रुकुम आउनुभएको हो । उहाँले ती सामान स्थानिय निकाय र अस्पताल प्रमुखलाई हस्तान्तरण गर्नुभयो ।

चौरजहारी अस्पतालका मेडिकल डाइरेक्टर डाक्टर कालेव बुढालाई पीपीई सामग्री हस्तान्तरण गर्दै नेता शर्माले उचित प्रयोग गर्न आग्रह गर्नुभयो । अस्पतालमा स्थापना गरिएको आइसोलेसन वार्डको अनुगमन समेत गर्नुभएका उहाँले लकडाउन खुलेपछि थप कोरोना भाइरसको संक्रमण फैलने संभावना रहेको भन्दै चौरजहारी अस्पतालको रहेको खाली जमिनमा तत्काल एटेज बाथरुम सहितको अस्पताल भवन निर्माण गर्न सुझाव दिनुभयो । उहाँले भवन निर्माणको लागि बजेटको अभाव नहुने भन्दै अबको ३ हप्ताभित्र भवन निर्माणको काम सम्पन्न गर्ने गरि काम गर्न स्थानीय सरकार र अस्पताल प्रशासनलाई आग्रह गर्नुभयो ।