बाग्लुङ, कैलाली र कंचनपुरमा र्‍यापिड टेष्ट किटबाट कोरोना परीक्षण गरिने

काठमाडौं, २२ चैत । सरकारले बागलुङ, कैलाली र कंचनपुरमा र्यापिड टेष्ट किटबाट कोभिड नाइन्टिनको परीक्षण गर्ने निर्णय गरेको छ । शनिबार बसेको मन्त्रिपरिषदको बैठकले गरेको निर्णय सार्वजनिक गर्दै सरकारका प्रवक्ता डा युवराज खतिवडाले तीन जिल्लामा र्यापिड टेष्ट किट प्रयोगमा ल्याई एकैपटक धेरैको परीक्षण गर्ने योजना सहित सरकार अघि वढ्ने निर्णयमा पुगेको जानकारी दिनुभयो ।

बाग्लुङमा दुई, कैलालीमा चार र कंचनपुरमा १ जना गरि तीन जिल्लामा ५ जनामा कोरोना संक्रमणको पुष्टि भएको छ । यी जिल्लाहरुमा अझै संक्रमितको संख्या बढ्न सक्ने भन्दै सरकारले र्यापिड टेष्ट किट मार्फत कोरोना परीक्षण गर्ने निर्णय गरेको हो । स्वास्थ्य तथा जनसंख्या मन्त्रालयले महामारी फैलिएको अवस्थामा एकैपटक धेरैको कोरोना परीक्षण गर्न भन्दै चीनबाट ७५ हजार थान र्यापिड टेष्ट किट खरीद गरेको छ ।

वैठकले स्वास्थ्यकर्मीहरुको सुरक्षाको ग्यारेन्टी गर्ने निर्णय पनि सरकारले गरेको छ । स्वास्थ्यकर्मीहरुलाई स्वास्थ्य उपकरणहरु यथासक्य उपलब्ध गराउने र ती उपकरणलाई निश्चित प्रोटोकल अनुसार प्रयोग गर्ने तथा उपचारमा खट्दा स्वास्थ्यकर्मीहरुको सुरक्षामा खलल पुर्याउनेलाई कडा कार्वाही गर्ने मन्त्रिपरिषद्को निर्णय गरेको छ ।  यसैगरी तीन जिल्लामा नयाँ केस भेटिएपछि सरकारले संक्रमण नियन्त्रणका लागि लकडाउनलाई कडा गर्ने भएको छ । मन्त्रिपरिषद्को निर्णय अनुसार एक प्रदेशबाट अर्काे प्रदेश, एक जिल्लाबाट अर्काे जिल्ला, स्थानिय स्थानबाट अर्काे स्थानमा जान पाइनेछैन ।