सय घरधुरी  मुसहर परिवारलाई ५ सय मास्क र २ सय साबुन वितरण

जनकपुर, १८ चैत । अनुसन्धान तथा परोपकारमा क्रियाशील  संस्था भोरले धनुषा जिल्लाको सबैला नगरपालिका वडा नं. १२ बडकुर्वामा रहेको सय घर मुसहर परिवारलाई ५ सय मास्क र २ सय  हातधुने साबुन वितरण गरेको छ । मुरहरबाहेक केही मुस्लिम परिवारमा पनि उक्त मास्क र साबुन वितरण गरिएको थियो ।  विश्वव्यापी कोरोना महामारी फैलिएको  बेला पनि उक्त एकसय  परिवार बसेको मुसहर समुदायमा मास्क पुग्न सकेको थिएन ।  

भोरका अध्यक्ष राजकुमार महतोले सामग्री वितरण गर्नुअघि सबैला नगरपालिका वडा नं. १२ रघुनाथपुरको वडा कार्यलयमा वडाअध्यक्ष प्रदिप महतो, भोरको तर्फबाट सरोजप्रसाद दुलाल, दलित अगुवा राजेन्द्र सदा, समाजसेवी दिप कुवँर लगायतका व्यक्तिहरुको रोहवरमा बैठक बसी अति नै गरिब र दैनिक ज्यालामजदुरी गरी जीवनयापन गर्ने बडकुर्वाको ८० दलित घर परिवारलाई वितरण गनुपर्ने निर्णयअनुसार सो वडामा वितरण गरिएको जानकारी दिनुभायो ।

चीनको उहानबाट शुरु भएको कोरोना भाइरस नेपालमा पनि महामारीको रुपमा हुन सक्ने सम्भावना भएकोले नेपाल सरकारले आउँदो चैत २५ सम्म लकडाउनको घोेषणा गरेकाे छ । विभिन्न माध्यमबाट कोरोना भाइरसबाट बच्न साबुन पानीले मिचिमिची हात धुनुपर्ने र मास्क लगाई कम्तिमा तीन फिटको दुरीमा बस्नुपर्ने कुरा प्रचार प्रसार गरिरहेका छन् ।  भोरका अध्यक्ष राजकुमार महतोले दलित मुसहर घरमा  साबुन र मास्क नभएका कारण सामग्री वितरण गरिएको जानकारी दिनुभयो । साबुन पानीले मिचिमिची हात धुने बानी मुसहर वस्तीमा नभएकोले सबै जना स्वस्थ रहुन् र जीवन रक्षा होस् भनी भोरको पहलमा मास्क र हातधुने साबुन वितरण गरिएको हो । 

सामाजिक दुरीलाई मध्यनजर गर्दै भोरको केन्द्रीय सदस्य सरोजप्रसाद दुलाल, वडा अध्यक्ष प्रदिप महतो, दलित अगुवा राजेन्द्र सदा, समाजसेवी दिपु कुवरको रोहवरमा प्रत्येक घरघरमा पुगी घरमा रहेको परिवारको सख्या अनुसार मास्क  वितरण गरिएका थियाे । मास्क र साबुन पाएका दलित परिवारका ७२ वर्षीय अनारोदेवी सदाले खुशी हुँदै वितरण गर्नेलाई आशिर्वाद सहित खुशी व्यक्त गर्नुभयो ।