स्वास्थ्य प्रणाली असन्तुलित हुँदा नाटकीय रुपमा मृत्युदर बढ्छ : विश्व स्वास्थ्य संगठन

काठमाडौं, १७ चैत । विश्व स्वास्थ्य संगठन (डब्ल्यूएचओ) ले खोप लगायत अत्यावश्यक स्वास्थ्य सेवाको निरन्तरतालाई असर नगर्ने गरि कोरोना भाइरस रोग (कोभिड नाइन्टिन) नियन्त्रणमा लाग्न सुझाव दिएको छ । जेनेभामा आयोजित नियमित प्रेस ब्रिफिङमा महानिर्देशक अधानोम टेड्रोसले कोभिड नाइन्टिनको महामारीले धेरै देशको स्वास्थ्य प्रणाली असन्तुलित अवस्थामा रहेको बताउनुभयो ।

उहाँले भन्नुभयो, शिशुहरु जन्मिरहेका छन्, उनीहरुलाई खोपहरु नियमित दिनुपर्छ त्यसैले समुहगत कार्य प्रणाली अनुसार स्वास्थ्य सेवा प्रवाह गर्नुपर्ने आवश्यकता रहेको बताउदै महानिर्देशक टेड्रोसले नियमित खोप लगायत अत्यावश्यक स्वास्थ्य सेवालाई निरन्तरता दिन गर्भावस्था र प्रसव समयको हेरचाह, संक्रामक र नसर्ने रोग तथा मानसिक स्वास्थ्य, रक्त सेवा लगायत अन्य सेवा प्रवाहमा पनि उत्तिकै ध्यान दिन विश्वका देशहरुलाई आग्रह गर्नुभयो ।

उहाँले भन्नुभयो, यसअघिका प्रकोपले देखाएको छ कि जब स्वास्थ्य प्रणाली असन्तुलित हुँदा खोप तथा उपचारबाट बचाउन सकिने बिरामीहरुको मृत्युदर नाटकीय रुपमा बढ्छ । कोभिड नाइन्टिनको रोकथाम तथा उपचारमा स्वास्थ्य सुविधा र स्वास्थ्यकर्मीको अत्याधिक मागले स्वास्थ्य प्रणाली असन्तुलित भएको उहाँले बताउनुभयो । हामी अहिले संकटको बीचमा छौं यो अवस्थामा पनि आवश्यक स्वास्थ्य सेवाहरु जारी राख्नुपर्दछ ।

विश्व स्वास्थ्य संगठनले स्वास्थ्य सेवाको मागको सन्तुलनमा सहयोग पुर्याउन निर्देशिकाहरु प्रकाशित गरेको भन्दै त्यसमा ध्यान दिन महानिर्देशक टेड्रोसले आग्रह गर्नुभयो ।