कोरोनाका कारण लण्डनमा पहिलो नेपालीको मृत्यु

काठमाडौं, ८ चैत । कोरोना भाइरसको संक्रमणबाट लण्डनमा एक पूर्व गोरखा सैनिकको मृत्यु भएको छ । संखुवासभा खांदबारी नगरपालिका १० स्थायी घर भई हाल लन्डन साउथ ह्यारोमा बस्दै आएका ६६ वर्षका लीलाबहादुर राईको मंगलबार (मार्च १७) लण्डनस्थित नर्थवीक पार्क अस्पतालमा मृत्यु भएको भए पनि घटना आज मात्रै सार्वजनिक भएको हेल्थपाटी डटकमलाई लण्डन प्लमस्टिडबाट उमेश तिवारीले जानकारी दिनुभयो ।  राई केही दिनअघि मात्र अस्पतालबाट घर फर्कनुभएको थियो । मंगलबार दिउँसो ४ बजेतिर उहाँको स्वास्थ्यमा अचानक समस्या देखिएपछि अस्पताल लगिएकोमा साँझ ८ बजेतिर चिकित्सकले मृत घोषणा गरेका थिए ।

राईको निधनको तीन दिनपछि अस्पतालले परिवारलाई सम्पर्क गरेर उहाँको निधन कोरोना भाइरसका कारण भएको जानकारी दिएको थियो । हाल सुनसरीको इटहरी उपमहानगरपालिकामा बसोबास गर्दै आएका राई सन् २००८ मा बेलायत जानुभएको थियो । सेकेण्ड गोरखा राइफल्समा १७ वर्ष सेवा गरेका राईको आर्मी नम्बर २११६०५८१ थियो । उहाँ श्रीमती र छोराबुहारीका साथ युकेमा बसोबास गर्दै आउनुभएको थियो ।

उहाँको करिब दुई दशकअघि मिर्गौला प्रत्यारोपण पनि गरिएको थियो अहिले राईको परिवारलाई पनि ‘आइसोलेसन’मा राखिएको छ । संखुवासभा समाज युकेले जिल्लाबासीलाई राईको परिवार आइसोलेसनमा रहेका कारण आफ्ना सदस्यहरुलाई पारिवारिक भेटका लागि अर्को सूचना जारी गरिने जनाएको छ ।