नीजि अस्पतालले कोरोना शंकास्पद बिरामीलाई हेर्नैपर्ने

काठमाडौं, ८ चैत । कोरोनाका लक्षण देखिएका बिरामीलाई तुरुन्तै स्वास्थ्य संस्थाहरुमा सम्पर्क गर्न सूचित गरिए पनि कहाँ जाने भन्ने अन्यौल भइरहेका बेला अब कुनै पनि अस्पतालमा गएर स्वास्थ्य परीक्षण गर्न सकिने भएको छ । सरकारले देशभरका सरकारी तथा नीजि अस्पतालाई अनिबार्य छुट्टै ज्वरो ओपिडी सेवा सञ्चालन गर्न निर्देशन दिएपछियो अन्यौल हटेको हो । अब ज्वरो आएमा, रुघाखोकी लागेमा, श्वासप्रश्वासमा समस्या भएमा नजिकैको नीजि तथा सरकारी अस्पतालहरुमा परीक्षण गर्न सकिनेछ । यसअघि नीजि अस्पतालमा जाँदा उनीहरुले सरकारी अस्पतालमा रिफर गरिदिन्थे ।

स्वास्थ्य तथा जनसंख्या मन्त्रालयका सह–प्रवक्ता सागर दाहालका अनुसार कुनै पनि अस्पतालले कोरोनाको पुष्टि नहुञ्जेलसम्म बिरामीलाई अन्यत्र रिफर गर्न पाउने छैनन् । शंका लागेका बिरामीको नमुना संकलन गरि राष्ट्रिय जनस्वास्थ्य प्रयोगशालामा पठाई रिपोर्ट नआउञ्जेल बिरामीलाई सोही अस्पतालमा आइसोलेसनमा राखेर उपचार गर्नुपर्ने उहाँले बताउनुभयो ।

सह–प्रवक्ता दाहालले भन्नुभयो, रिपोर्ट नेगेटिभ आए बिरामीको अवस्था हेरेर डिस्चार्ज गर्ने र यदि रिपोर्ट पोजेटिभ आएमा कोरोनाको उपचार गर्ने सम्बन्धित अस्पतालमा रिफर गर्नुपर्नेछ अस्पतालबाट अर्काे अस्पतालसम्म पठाउँदा संक्रमण अरुलाई नसर्ने गरि व्यवस्थित उपाय अपनाउनुपर्नेछ । शुक्रबार बिहानसम्म नेपालमा देशभरबाट ५ सय ८० जनाको नमुना परीक्षण गरिएकोमा सबैको रिपोर्ट नेगेटिभ आएको छ ।

कहाँ – कहाँ हुन्छ कोरोना भाइरस नमुना परीक्षण ?

यदी कोरोनाको लक्षण जस्तै ज्वरो आए ,रुघाखोकी लागेमा तथा सास फेर्न अप्ठेरो भए तुरुन्तै स्वास्थ्य संस्था जानुपर्दछ । यस्ता लक्षण देखिएकाहरुले चिकित्सकको परामर्श अनुसार नमुना परीक्षण गर्नुपर्दछ । अहिले नमुना परीक्षण राष्ट्रिय जनस्वास्थ्य प्रयोगशाला टेकूमा मात्रै भइरहेकोमा अब वीर अस्पताल, धुलिखेल अस्पताल,बी.पी कोइराला स्वास्थ्य विज्ञान प्रतिष्ठान धरानमा पनि हुनेछ । राष्ट्रिय जनस्वास्थ्य प्रयोगशालालाई कम्तिमा २० हजार नमुना परीक्षणका लागि तयारी अवस्थामा राखिएको छ ।

कोरोनाको उपचारमा खटिने चिकित्सक, नर्स र स्वास्थ्यकर्मी कति छन् ?
स्वास्थ्य तथा जनसंख्या मन्त्रालयले क्रिटिकल केयर सम्बन्धी विशेषज्ञ चिकित्सक, नर्स तथा स्वास्थ्यकर्मीको सूची तयार गर्न क्रिटिकल केयर सोसाइटीलाई पत्राचार गरिसकेको छ ।

यदि कोरोनाको रिपोर्ट पोजेटिभ आएमा उपत्यकामा कहाँ गरिन्छ उपचार ?
१ .टेकु अस्पताल                      : २० आइसियू बेड सहित
२. पाटन अस्पताल                   : २० आइसियू बेड सहित
३. सशस्त्र प्रहरीको अस्पताल      : २० आइसियू बेड सहित
 ४.नेपाली सेनाको अस्पताल       : २० आइसियू बेड सहित
 ५.वीर अस्पताल                    : २० आइसियू बेड सहित
 ६.आयुर्वेद अस्पताल, कीर्तिपुर    : २० आइसियू बेड सहित

प्रदेशमा कोरोना उपचारका लागि छुट्याइएको अस्पताल
     
प्रदेश नं. १ : मेची अस्पताल र उदयपुर अस्पताल

प्रदेश नं. २ : जनकपुर अस्पताल र बारा अस्पताल

बागमती प्रदेश : भक्तपुर अस्पताल र गोर्खा अस्पताल

गण्डकी प्रदेश : धौलागिरी अस्पताल र गोर्खा अस्पताल

कर्णाली प्रदेश : सुर्खेत अस्पताल र दैलेख अस्पताल

सुदूरपश्चिम प्रदेश : सेती अस्पताल र महाकाली अस्पताल

आइसोलेसन वार्ड, भेन्टिलेटर सहित आइसियू स्थापनाका लागि प्रत्येक अस्पताललाई १ करोडका दरले बजेट विनियोजन गरिएको छ ।