देशभरका अस्पतालमा अति आवश्यक सेवा मात्र सञ्चालन हुने

काठमाडौं, ६ चैत । नेपाल मेडिकल काउन्सिलले देशभरका अस्पताललाई जनरल हेल्थ चेकअप क्लिनिकहरु सञ्चालन नगर्न आग्रह गरेको छ । काउन्सिलले विज्ञप्तl निकालेर अति आवश्यक बाहेक भीड हुने गरि अन्य सेवा सञ्चालन नगर्न आग्रह गरेको हो । यसैगरी अत्यावश्यक बाहेकका दन्त चिकित्सा सेवा सञ्चालन नगर्ने तथा गर्नै परेमा व्यक्तिगत सुरक्षा उपकरणको प्रयोग गर्न पनि काउन्सिलले अपिल गरेको छ ।

एक सय शैया भन्दा माथिका अस्पतालहरुले व्यक्तिगत सुरक्षा उपकरण सहित छुट्टै ज्वरो क्लिनिक सञ्चालन गर्न निर्देशन दिएको छ । यसैगरी काउन्सिलले सर्वसाधारणलाई पनि अतिआवश्यक परीक्षण बाहेकमा अस्पताल नजान आग्रह गरेको छ । यसअघि नेपाल चिकित्सक संघले पनि अति आवश्यक नपरि अस्पताल नजान आग्रह गरिसकेको छ । कोरोना संक्रमणको जोखिम न्यूनीकरणका लागि काउन्सिलले देशभरका अस्पतालहरुलाई यस्तो निर्देशनात्मक सुझाव दिएको हो  ।

यसैबीच काउन्सिलको निर्देशनात्मक सूचनापछि अस्पतालहरुले आफ्नो सेवामा कटौती गरेका छन् । शिक्षण अस्पताल महाराजगञ्जले सामान्य स्वास्थ्य परीक्षण बन्द गरेको छ । अस्पतालले सूचना जारी गरि अति आवश्यक अवस्थामा मात्र अस्पताल आउन आग्रह गरेको छ ।