अमेरिकामा नेपाली व्यवसायी र विद्यार्थी संकटमा

न्यूयोर्क, ४ चैत । विश्वकै प्रमुख व्यापारिक केन्द्र न्यूयोर्कमा कोरोनाको प्रभाव थप जटिल हुन थालेपछि  नेपालीको बाक्लो बस्ती रहेको ज्याक्सन हाइटमा दर्जन भन्दा बढी नेपाली रेष्टुरेष्ट बन्द हुने अवस्थामा पुगेका छन् । सरकारले कोरोनाको त्रास बढेपछि न्यूयोर्कको राती अबेरसम्म खुल्ने रेष्टुरेण्ट बन्द गर्ने निर्णय गरेपछि नेपाली व्यवसायी मारमा परेका छन् । यस क्षेत्रमा काम गर्ने ठूलो संख्यामा रहेका नेपाली विद्यार्थीहरु पनि बेरोजगार हुन पुगेका छन् ।

न्यूयोर्कमा कोरोनाको महामारीले थप संकट निम्त्याउन थालेपछि सरकारले दश जनाभन्दा बढी भेला हुन नदिने र मंगलबारदेखि सम्पूर्ण रेष्टुरेष्ट बन्द गर्न निर्देशन जारी गरिसकेको छ । सरकारको यो निर्णयले होटल तथा रेष्टुरेण्ट क्षेत्रमा संलग्न व्यवसायीले ठूलो घाटा व्यहोर्नु पर्ने भएको छ । यस क्षेत्रमा ठूलो संख्यामा नेपाली कामदार संलग्न छन् ।

न्यूयोर्क राज्यको क्वीन्समा हिमालयन याक, लालीगुराँस रेष्टुरेण्ट, नमस्ते रेष्टुरेण्ट, नेपाली भान्छा घर, थकाली रेष्टुरेण्ट, याक रेष्टुरेण्ट, सुम्नीमा रेष्टुरेण्ट, रेडपाण्डा रेष्टुरेण्ट, तावा रोटी, काठमाडौं फ्यूजन किचेन, बेम्बो हाउस एण्ड वार, थकाली लगायत दर्जनौ नेपाली रेष्टुरेण्ट खुलेका छन् । न्यूयोर्कको क्वीन्समा पछिल्लो पटक रेष्टुरेण्ट क्षेत्रमा नेपालीले लगानी बढाउँदै गएका थिए । अमेरिकामा अध्ययनका लागि आउने धेरै विद्यार्थी रेष्टुरेण्टमा नै काम गर्ने गर्दछन् । 

उनीहरुलाई कोठा भाडा तिर्न पनि धौधौ हुने अवस्था आएको एक विद्यार्थीले गुनासो गर्नुभयो । “कागज पत्र छैन, नेपाल  जान पनि सक्दैनौ, यता रेष्टुरेण्ट पनि  बन्द छ, बाग्लुङका एक सेफले भन्नुभयो ।” कोरोनाको कारण ऋणको भार अब थपिने उहाँको भनाई छ ।  नेपाली भान्छा घरका संचालक विमला हमाल कोरोना भाइरसका कारण व्यवसाय डामाडोल भएको बताउनुभयो । अहिले व्यापार नभएपछि रेष्टुरेण्ट नै बन्द गर्नुपर्ने अवस्था आएको उहाँले बताउनुभयो ।