कोरोना भाइरसका कारण इटालीमा मृत्यु हुनेको संख्या ३३६ पुग्यो
सेना प्रमुखलाई पनि संक्रमण
इटलीमा कोरोनाभाइरसको सङ्क्रमणबाट मृत्यु हुनेको सङ्ख्या १३३ थपिएर ३ सय ६६ पुगेको अधिकारीहरूले जनाएका छन् ।सङ्क्रमितहरूको सङ्ख्या २५ प्रतिशत बढेर ५ हजार ८ सय ८३ बाट ७ हजार ३ सय ७५ पुगेको छ।
प्रकोप नियन्त्रणका लागि आइतवार दशौँ लाख मानिसहरूको निम्ति नयाँ प्रतिबन्धहरू लगाइएपछि पनि उक्त सङ्ख्या थपिएको छ । लोम्बर्डी र १४ वटा प्रान्तका एक करोड ६० लाख मानिसलाई नयाँ क्वारेन्टाइन अन्तर्गत यात्राको निम्ति विशेष अनुमति लिनुपर्ने बताइएको छ ।
प्रधानमन्त्री जुजेप्पे कोन्टेले देशभरिका विद्यालय, व्यायामशाला, सङ्ग्रहालय, रात्रि क्लब र अन्य स्थल बन्द गर्ने घोषणा पनि गरेका छन् । ती निर्णय एप्रिल ३ सम्म लागु हुनेछन् ।
सेना प्रमुख पनि सङ्क्रमित
पछिल्लो तथ्याङ्कसँगै गत डिसेम्बर महिनामा प्रकोप देखा परेको देश चीनबाहिर सबैभन्दा धेरै सङ्क्रमित फेला परेको देश इटली बनेको छ । इटलीले ७३१३ जना सङ्क्रमित देखिएको दक्षिण कोरियालाई उछिनेको हो।
कोरोनाभाइरस सङ्क्रमण रोकथाम गर्न इटलीमा १ करोड ६० लाख मानिस क्वारेन्टाइनमा रहेका छन् ।
चीनमा कोरोनाभाइरस सङ्क्रमितका आफन्तलाई राखिएको होटल भत्किँदा छ जनाको मृत्यु भएकाे छ ।
इटलीमा पछिल्लो पटक सङ्क्रमण पुष्टि भएकाहरूमा सेना प्रमुख पनि छन्। सल्वाटोरे फरिनाले आफू एकान्तमा बसिरहेको र स्वस्थ महसुस गरिरहेको बताए।
नयाँ क्वारन्टीनका कडा नियमले इटलीको एक चौथाइ जनसङ्ख्या र देशको अर्थतन्त्रमा ठूलो योगदान दिने उत्तरी भागको केन्द्र पनि प्रभावित बनेका छन् । प्रधानमन्त्री कोन्टेले शनिवार मध्यरातमा गरेको घोषणामा भनेका छन्, “हामी हाम्रा नागरिकको स्वास्थ्य सुनिश्चित गर्न चाहन्छौँ ।“
नयाँ नीतिअनुसार मनिसहरूले मिलान मुख्य सहर रहेको लोम्बर्डी जान र छाड्न पाउँदैनन् । १४ वटा राज्यमा केही प्रतिबन्धहरू लगाइएकाे छ ।
हवाई सेवा प्रभावित
मिलानका दुईवटा विमानस्थलमा जहाज अवतरण जारी थियो । तर केही उडान तालिका रद्द गरिएका छन् । इटलीको सरकारी ध्वजावाहक एलइटालियाले मल्पेन्सा विमानस्थलबाट हुने सबै उडान सोमवारबाट रद्द गरिने र लिनाटे विमानस्थलमा आन्तरिक उडान मात्र हुने जनाएको छ।
रोममा उत्रिने र त्यहाँबाट उड्ने अन्तर्रा्ष्ट्रिय उडान जारी रहने उसको भनाइ छ।
कोरोनाभाइरस फैलिने डरले इरानमा हजारौँ कैदी तत्कालका लागि रिहा गरिएकाे छ ।
कोरोनाभाइरस सङ्क्रमण हुँदा मृत्यु हुने सम्भावना कति ?
विश्व स्वास्थ्य सङ्गठनले प्रतिबन्धहरू लगाएर असल योगदान गरेको भन्दै इटलीको प्रशंसा गरेको छ।
आइतवारसम्म उत्तरी इटलीमा क्वारेन्टाइन नीतिले ५० हजार मानिसमात्र प्रभावित थिए।
गत साता सरकारले १० दिनका निम्ति सबै स्कुल र विश्वविद्यालय बन्द गर्ने घोषणा गरेको थियो।
अन्यत्र कस्तो छ ?
विश्वभरी सङ्क्रमितहरूको सङ्ख्या १ लाख ७ हजारभन्दा धेरै र मृतकको सङ्ख्या करिब ३ हजार ६ सय पुगेकाे छ ।
धेरै मृत्यु चीनमा भएको छ । तर जनवरी महिनायता दैनिक सङ्क्रमित हुने सङ्ख्या आइतवार सबैभन्दा कम देखिएको छ । त्यसले भाइरसको विस्तारको गति कम भएको सङ्केत दिन्छ ।
चीन बाहिर निकै खराब ढङ्गले प्रभावित देशमध्येको एक इरानमा सङ्क्रमितको सङ्ख्या ६ हजार ५ सय ६६ पुगेको छ भने १ सय ९४ जनाको मृत्यु भएको छ । तर वास्तविक सङ्ख्या निकै बढी हुनसक्ने आशङ्का गरिन्छ । सरकारका एक दूतलाई उद्धृत गर्दै आइतवार एउटा रिपोर्टमा गिलान प्रान्तमा मात्र दुई सय जनाको मृत्यु भएको तर पछि त्यो तथ्याङ्क मेटाइएको उल्लेख छ।
श्रोतः बिबिसी
तपाईँको अभिमत