औषधि अभाव हुन दिन्नौँ : औषधि उत्पादक संघ

काठमाडौं, २३ फागुन । नेपाल औषधि उत्पादक संघ (एपोन) ले अझै ६ महिनाकाे लागि पुग्ने औषधि रहेको जानकारी दिएको छ । शुक्रबार एपोनले पत्रकार सम्मेलन गरि कुनै पनि हालतमा औषधि अभाव हुन नदिने जानकारी दिएको हो ।

विश्वब्यापी रुपमा फैलिएको कोरोना भाइरस (कोभिड नाइन्टिन) का कारण औषधि आयातमा भारतले रोक लगाएपछि नेपालमा औषधि अभाव हुने हल्ला सत्यता नभएको भन्दै औषधि उत्पादन  संघका अध्यक्ष जितनारायण क्षेत्रीले  नेपाली बजारमा अझै ६ महिनाकाे लागि पुग्ने औषधि रहेकोले नआत्तिन आग्रह गर्नुभयो ।

औषधि, मास्क लगायतका अत्यावश्यक औषधि अभाव हुने हल्ला फैलिरहेको बेला संघले हल्लाको पछि लागेर औषधि स्टक नगर्न पनि व्यावसायीहरुलाई आग्रह गरेको छ ।  संघका अध्यक्ष क्षेत्रीले  नेपालमा औषधिका लागि आवश्यक कच्चा पदार्थ भारत र चीनबाट आयात हुने भए पनि आवश्यक परे अन्य मुलुकबाट समेत आयात गरिने बताउनुभयो । 

संघका महासचिव विप्लव अधिकारीले  सरकारले औषधिको कच्चा पदार्थ आयातमा सहज बनाउनुपर्ने बताउनुभयो ।  उहाँले  कच्चा पदार्थमा मुल्यवृद्धि भए  औषधिको पनि मुल्यवृद्धि हुन सक्ने बताउनुभयो ।  संघका निवर्तमान   अध्यक्ष  दिपक दाहालले  भारतले  औषधि निर्यात रोकेको अवसरलाई औषधिमा आत्मनिर्भर हुने अवसरका रुपमा लिनुपर्ने बताउनुभयो  ।