कोरोनाको प्रभाव : मापसे जाँच्ने तरिका फेरियो

काठमाडौं, २२ फागुन । ट्राफिक प्रहरीले कोरोना संक्रमण न्यूनीकरणका लागि मापसे जाँचको तरिका केहि परिवर्तन गरेको छ । ब्रेथलाइजर मार्फत जाँच गर्दै आएकोमा अहिले टाढैबाट कुरा गराइका आधारमा जाँच सुरु गरिएको छ । प्रहरी उपरीक्षक एवं महानगरीय ट्राफिक प्रहरी प्रवक्ता जीवनकुमार श्रेष्ठले भन्नुभयो, पहिला प्रत्येक चालकलाई ब्रेथलाइजर मार्फत जाँच गर्थ्र्याै तर अहिले कोरोना संक्रमणको जोखिम उच्च भएपछि हामीले चालकको व्यवहारका आधारमा मात्र जाँच्ने गरेका छौं ।

कोरोना भाइरस संक्रमित सँगको प्रत्यक्ष सम्पर्कबाट अर्काे मानिसमा सजिलै सर्ने एवं विना लक्षण पनि कोरोना संक्रमण देखिरहेकाले हामीले पनि नजिकबाट हुने सम्पर्कलाई टाढा बनाएका छौ श्रेष्ठले थप्नुभयो । बाग्मती प्रदेशमा करिव १२ लाख सवारी साधन दर्ता छन्, त्यसको ९० प्रतिशत सवारी गुड्ने गर्छन् र यो सवारी चापको व्यवस्थापनमा काठमाडौमा १ हजार ४ ट्राफिक प्रहरी खट्छन् । काठमाडौं उपत्यकामा मात्र दैनिक करिव १ सय चालकालाई मापसे कारवाही गरिने श्रेष्ठले बताउनुभयो । ३० चालकमध्ये १ जना कारवाहीमा परे पनि दिनको करिव ३ हजार चालकको मापसे जाँच हुने गरेको अनुमान गर्न सकिन्छ ।

यस्तै दैनिक रुपमा विभिन्न ट्राफिक नियम उल्लघंन गरेका करिब ३ हजार जनालाई कार्वाही गरिने प्रवक्ता श्रेष्ठले बताउनुभयो । लाखौं मानिसको प्रत्यक्ष सम्पर्कमा रहि सडकमा खटिने ट्राफिक प्रहरी कोरोना संक्रमणको उच्च जोखिममा रहेका छन् । स्वास्थ्य सुरक्षाका लागि ट्राफिक प्रहरीलाई अनिवार्य रुपमा मास्क, पञ्जा, चश्मा लगाउन निर्देशन दिइएको ट्राफिक प्रवक्ता श्रेष्ठले बताउनुभयो ।

यसैगरी स्वास्थ्य सेवा विभागका महानिर्देशक महेन्द्रप्रसाद श्रेष्ठले प्रत्येक ट्राफिक प्रहरीको स्वास्थ्य सुरक्षा र ट्राफिक जाँचमा व्यक्तिगत सुरक्षा सामाग्रीको अनिवार्य प्रयोग गरी उचित दुरीमा रही जाँच खटिन सुझाव दिनुभयो । जाँचको क्रममा कसैलाई केही स्वास्थ्य समस्या देखिएमा तुरुन्त स्वास्थ्य परीक्षणका लागि पठाउनुपर्ने उहाँले बताउनुभयो ।