कोरियामा सबै नेपाली सुरक्षित : नआत्तिन दूतावासको आग्रह (अडियो सहित )
काठमाडौं, १६ फागुन । दक्षिण कोरियाको सिओलस्थित नेपाली दूतावासले त्यहाँ रहेका सबै नेपाली सुरक्षित रहेको बताएको छ । श्रम सहचारी डिल्लीराम बाँस्तोलाले हेल्थपाटी डटकमसँग आजको दिनसम्म सबै नेपाली सुरक्षित रहेको र आफूहरु निरन्तर नेपालीको सम्पर्कमा रहेको बताउनुभयो । कोरियामा कोरोना संक्रमण उच्च रहे पनि अहिलेसम्म नेपालीले नेपाल फर्कन चाहेको भनेर निवेदन नदिएको बताउनुभयो ।
कोरियामा हाल करिब ४० हजारको संख्यामा नेपालीहरु रहेको बताउँदै सबैलाई सतर्कता अपनाउन सचेत गरिएको जानकारी दिनुभयो । कोरियामा करिव ३ हजार नेपाली अवैधानिक रुपमा बसिरहेको भए पनि अहिले उनीहरुलाई समस्या नरहेको बताउनुभयो । कोरोना संक्रमणको जोखिम न्यूनीकरण गर्न कोरिया सरकारले अवैधानिक रुपमा बसिरहेका सबै व्यक्तिलाई स्वाथ्य परीक्षणका लागि खुला गरेकाले अहिले नेपालीहरूलाई पनि कुनै समस्या नरहेको बताउनुभयो ।
अति प्रभावित क्षेत्र थेगुमा करिव १ हजार नेपाली रहेको जानकारी दिँदै उनीहरुलाई सतर्कता अपनाउन जारी गरिएको सबै नियम पालना गर्न दूतावासले निर्देशन दिइसकेको बताउनुभयो । उहाँले गैरआवासीय संस्था तथा त्यहाँ रहेका नेपाली समाजहरुसँग मिलेर जनचेतनाका लागि विभिन्न कार्यक्रम सुरु गरिसकेको बताउनुभयो ।
दक्षिण कोरियाका लागि श्रम सहचारी डिल्लीराम बाँस्तोलासँग टेलिफोन मार्फत हेल्थपाटी डटकमका लागि जगन्नाथ ढकालले कुराकानी गर्नुभएको छ । भिडियाेमा सुनाैँ बाँस्तोलासँगकाे कुराकानी ः
तपाईँको अभिमत