अमेरिकामा आपतकाल, जापानका सम्पूर्ण विद्यालय बन्द
विश्वका ४८ देशमा फैलियो कोरोना भाइरस
हेल्थपाटी - फाल्गुन १६, २०७६ ०९:०२ मा प्रकाशित
अ +
अ -
एजेन्सी, १६ फागुन । विश्वभर तिब्र गतिमा कोरोना भाइरसको संक्रमण देखिएपछि अमेरिकाले पनि आपतकालको घोषणा गरेको छ । सन फ्रान्सिस्कोका मेयर लन्दन ब्रिदले कोरोनोको संक्रमण नियन्त्रणका लागि आपतकालको घोषणा गर्नुभएको अमेरिकी सञ्चार माध्यमहरुले जनाएका छन् ।
सन फ्रान्सिस्कोमा अहिलेसम्म एक जनामा पनि कोरोनाको संक्रमण देखिएको छैन यद्यपि नियन्त्रणको पूर्वतयारीका लागि आपतकाल घोषणा गरिएको हो, मेयर ब्रिदले भन्नुभयो । विश्वमा दिनदिनै नयाँ नयाँ ठाउँमा ठूलो संख्यामा संक्रमणको संख्या बढिरहेकाले सचेतता अपनाइएको उहाँले बताउनुभयो ।
यस्तै कोभिड नाइन्टिनको संक्रमण विश्वभर फैलिएपछि संक्रमण नियन्त्रणका लागि जापानले देशभरका विद्यालय बन्दको घोषणा गरेको छ । जापानका प्रधानमन्त्री शिन्जो अबले मार्च अन्त्यसम्मका लागि सबै तहका विद्यालय बन्दको घोषणा गर्नुभएको अन्तर्राष्ट्रिय सञ्चार माध्यमहरुले जनाएका छन् । देशभर रहेका ३४ हजार ८ सय ४७ विद्यालय बन्द गरिएपछि १ करोड २८ लाख विद्यार्थी प्रभावित भएका छन् ।
प्रधानमन्त्री अबेले विश्वभर संक्रमण तिब्र गतिमा फैलिएकाले अबको दुई साता महत्वपूर्ण समय रहेको बताउँदै कोरोनाको संक्रमणबाट विद्यार्थीहरुलाई जोगाउन यो कदम लिइएको बताउनु भएको छ ।
जापानमा बिहीबार कोरोनाका कारण आठौं व्यक्तिको मृत्यु भएको समाचार बाहिर आएपछि प्रधानमन्त्री अबेले विद्यालय बन्दको घोषणा गर्नुभएको हो । जापानमा हालसम्म ८ सय ९० भन्दा बढीमा संक्रमण देखिएको छ ।
तपाईँको अभिमत