कोरोनाले नेपालमा हुने अन्तर्राष्ट्रिय सम्मेलन प्रभावित
चार सय जनाले बुकिङ रद्ध गरे

न्यूयोर्क, ६ फागुन । बालबालिकाको शिक्षा, स्वास्थ्य र बृत्तिविकासको क्षेत्रमा काम गर्ने अमेरिकी अन्तर्राष्ट्रिय सामाजिक संस्था किवनिस इन्टरनेशनलले नेपाल भ्रमण वर्ष २०२० को अवसरमा गर्न लागेको अन्तर्राष्ट्रिय सम्मेलन कोरोना भाइरसको कारण प्रभावित हुने भएको छ ।
अमेरिकाको इन्डियाना पोलिसमा प्रधान कार्यालय रहेको किवनिसको यही अगामी मार्च ५ देखि ७ तारिखमा काठमाडौंमा ४५औ किवनिस एशिया प्यासिफिक कन्भेन्सन हुन लागेको हो । विश्वभर ८० देशमा ६ लाख स्वयंसेवक रहेको किवनिसको उक्त सम्मेलनमा करिब एक हजार जना विदेशीले सहभागिता जनाउने निश्चित भइसकेको थियो । तर, कोरोनाको कारण होटल बुकिङ गरिसकेकाले पनि धमाधम बुकिङ रद्ध गर्न थालेको जानकारी ब्रेक एण्ड लिंक्सलाई प्राप्त भएको छ ।
नेपाल भ्रमण वर्ष २०२० को लागि कोशेढुङ्गा सावित हुने यो सम्मेलनमा सहभागिता निश्चित भएका ३५० जना ताइवानी डेलिगेट्स र ५० जना जापानी सहभागीले बुकिङ रद्ध गरेको छन् । सन् २०२०/२१ का किवनिसका निर्वाचित गर्भनर मोहन लम्सालले पनि सहभागीले बुकिङ रद्ध भएको स्वीकारेका छन् ।
नेपाल कोरोना भाइरस फ्रि देश भएको सन्देश फैलाउन पनि अब सम्मेलन भने गरेरै छोड्ने दावी गर्दै लम्सालले भने, “हामीले दश जना भए पनि सम्मेलन गर्नै पर्छ । ”चाइना साउथर्न भएर नेपाल आउनुपर्ने भएकोले केही देशका डेलिगेट्सले अन्तिम समयमा सहभागिता जनाउन नसक्ने सन्देश पठाएको लम्सालले बताए ।
सम्मलेनमा एक हजारभन्दा बढीको सहभागिता अपेक्षा गरिए पनि त्यस अनुसारको भव्य कार्यक्रम भने नहुने निश्चित भएको छ । अमेरिकाबाट ६० र अष्ट्रेलियाबाट एक सय जनालगायत अरु केही देशका डेलिगेट्सले हामी सहभागी हुन्छौं भनेकाले केही आशा भने जीवितै रहेको लम्सालले बताए ।
अन्तर्राष्ट्रिय लाइन्स क्लबभन्दा पुरानो मानिएको यो संस्था १९१५ जनवरी २१ तरिखमा अमेरिकाको मिचिगन राज्यमा गठन भएको थियो ।
तपाईँको अभिमत