भिडियो: अष्ट्रेलियाको डढेलो राजधानी छिर्नै आँट्यो

काठमाडाैं, २० माघ । यसअघि पनि अष्ट्रेलियामा पटक पटक डढेलो लागेको भए पनि अहिलेको डढेलोले विकराल रुप लिएपछि डढेलोका कारण १७ वर्षपछि पहिलो पटक आपत्कालिन राज्यको घोषणा गरिएको हो ।

नामाड्गी राष्ट्रिय निकुञ्जमा डढेलो पसेपछि वरपरका शहरमा फैलने डरले क्यानबारामा आपतकालको घोषणा गरिएको हो । त्यहाँ तिब्र गतिमा डढेलो सरिरहेकाले वरपरका शहर गाउँ उच्च जोखिममा रहेको अन्तर्राष्ट्रिय सञ्चार माध्यमहले जनाएका छन् ।

गत सेप्टेम्वरदेखि फैलिएको डढेलोका कारण ५० करोड भन्दा बढि जनावर मारिएको अनुमान गरिएको छ भने सखाप भएको जमिनको एकिन तथ्य अझै आउन सकेको छैन । 

उच्च तापक्रम र तेज हावाका कारण क्यानबारामा डढेलो फैलने सम्भावना उच्च रहेको चेतावनी दिँदै सतर्क रहन आग्रह गरिएको छ । तापक्रम नघटेकाले त्यहाँ अब तिब्र गतिमा डढेलो फैलने चेतावनी दिइएको छ ।  अहिले अष्ट्रेलियामा आकाश धमिलो देखिएको छ भने जमिन कालो छ । 

डढेलो झन्झन् फैलँदै गएकाले क्यानबारा र वरपरका क्षेत्रका बासिन्दालाई सकेसम्म घरबाहिर ननिस्कन भनिएको छ । डढेलोको धुवाँले मानिसहरूलाई श्वासप्रश्वास, आँखामा समस्या देखिनुका साथै रुघाखोकीले चापेको अष्ट्रेलियाबाट रोजिना पराजुलीले जानकारी दिनुभएको छ ।

स्वास्थ्य अधिकारीहरूका अनुसार डढेलोका कारण अब अष्ट्रेलिया र वरपरका देशहरूमा मुटु तथा मानसिक विरामी बढ्ने छन् । यसको दीर्घकालिन स्वास्थ्य असर भयावह हुने अधिकारीहरूले बताएका छन् ।

डढेलोका कारण हावामा अत्याधिक कार्बन डाई अक्साईडको मात्रा रहन्छ । जसले सवैभन्दा धेरै फोक्सोमा असर पुर्याउँछ । धुवाँले आँखामा असर पार्ने छ भने अरु सरुवा रोगको महामारीको खतरा पनि उत्तिकै रहन्छ ।

डढेलोले पर्यावरण नष्ट बनाएको छ जसले ईको सिस्टम टुटेको छ । प्रकृतिमा पुर्याएको क्षतिले मानव स्वास्थ्यमा के–कस्ता असरहरू पर्दछन् र अब हेरौँ जनस्वास्थ्य विज्ञ डाक्टर वावुराम मरासिनीलाई यस भिडियोमा ।