कुनै पनि जनावरको बेचबिखनमा कडा प्रतिबन्ध
जनावरहरु हुर्काइएका र पालिएका ठाउँहरु क्वारेन्टाइन गरिएको
एजेन्सी, १२ माघ । चीनले नोवेल कोरोना भाइरस तिव्र गतिमा फैलदै गएपछि राष्ट्रव्यापी रुपमा जनावर बेचबिखनमा प्रतिबन्ध लगाएको छ ।
बजार नियमन,कृषि र ग्रामिण मामिला राज्य प्रशासन र राष्ट्रिय वन तथा ग्रासल्याण्ड प्रशासनले देशभर जनावरको व्यापारलाई प्रतिबन्ध लगाएको चिनिया सरकारी टेलिभिजन चाइना ग्लोबल नेटवर्क सीजीटीएनले केहीबेर अघि समाचार प्रशारण गरेको छ ।
यी दुई सरकारी निकायले संयुक्त विज्ञप्ति निकालेर कुनै पनि जनावरलाई एक ठाउँबाट अर्काे ठाँउमा स्थानान्तरण नगर्न सूचना जारी गरेको हो । जंगली जनवारहरु हुर्काइएका र पालिएका ठाँउहरु क्वारेन्टाइन गरिएको छ भने कुनै पनि जंगली जनावरको बेचबिखनमा कडा प्रतिबन्ध लगाईएको छ ।
शनिबार राष्ट्रपति सी जिनपिङले आफ्नो देश गम्भीर अवस्थाबाट गुज्रिरहेको बताउँदै सरकारी अधिकारीहरुलाई कोरोना भाइरस नियन्त्रण र रोकथामका लागि कडा निर्देशन दिनुभएको थियो ।
चीनमा हालसम्म कोरोना भाइरसको संक्रमणबाट ५६ जनाको मृत्यु भईसकेको छ ।
यस्तै हुवान प्रान्तमा थप नौ सय स्वास्थ्यकर्मी परिचालन गरिएको छ । कोरोना भाइरसले खतरा निम्त्याएपछि थप संक्रमण हुनै नदिने प्रयास स्वरुप स्वास्थ्यकर्मीहरु खटाइएको सीजीटीएनमा भनिएको छ ।
तपाईँको अभिमत