डब्लुएचओको नयाँ प्रतिवेदन : सुर्तीजन्य पदार्थ नियन्त्रण नीतिका कारण यसबाट ६.१ अर्ब मानिस सुरक्षित

विश्व सुर्तीजन्य पदार्थ नियन्त्रण सम्मेलन २०२५ मा विश्व स्वास्थ्य संगठन (डब्लूएचओ) ले ‘ग्लोबल टोब्याको एपिडेमिक २०२५’ प्रतिवेदन हालै सार्वजनिक गरेको छ। प्रतिवेदन अनुसार, सुर्तीजन्य पदार्थ नियन्त्रणका उपायले हालसम्म विश्वका ६.१ अर्ब मानिसलाई सुरक्षा प्रदान गरेको छ । 

यो सङ्ख्या विश्व जनसंख्याको तीन चौथाइ हिस्सा हो।

डब्लूएचओको रणनीतिअन्तर्गत निगरानी, धुवाँरहित वातावरण, छाड्नेलाई सहयोग, चेतावनी, विज्ञापन प्रतिबन्ध र कर वृद्धिको उपायहरू लागू गरिएका छन्। सन् २००७ मा १ अर्ब जनसंख्या मात्र यस्ता नीतिमा समेटिएको थियो, अहिले १५५ देशले कम्तिमा एउटा उपाय अपनाएका छन् ।

ब्राजिल, मौरिसस, नेदरल्यान्ड्स र टर्कीले सबै ६ उपाय कार्यान्वयन गरेका छन् भने सात देशहरू एक उपाय टाढा छन्।

तर अझै ४० देशले एक पनि उपाय सर्वोत्कृष्ट रूपमा कार्यान्वयन गरेका छैनन्। साथै, ३० भन्दा बढी देशमा चेतावनीबिना चुरोट बिक्री भइरहेको छ।

डब्लूएचओले सरकारहरूलाई सुर्तीजन्य पदार्थ वा चुरोट उद्योगको हस्तक्षेपविरुद्ध कडाइ गर्न, नीति प्रवद्र्धन बलियो बनाउन र सचेतना अभियानमा लगानी गर्न आह्वान गरेको छ।

‘सुर्तीको महामारी अन्त्य गर्न अबको कदम अझ निर्णायक हुनुपर्छ’, डब्लूएचओले भनेको छ ।