कोभिशिल्ड खोपको  दोस्रो मात्रा लगाउने कार्यक्रम आजदेखि

कोरोना विरुद्धको खोप कोभिशिल्ड खोपको पहिलो मात्रा लगाएका ज्येष्ठ नागरिकसहित सबैलाई आजदेखि दोस्रो मात्रा लगाइदैछ । 

सरकारले भुटान र जापानबाट आएको एष्ट्राजेनिकाको खोप कोभिशिल्डको पहिलो मात्रा लगाएका ज्येष्ठ नागरिकहरुलाई दोस्रो मात्रा लगाउन लागेको हो । 

स्वास्थ्य सेवा विभाग खोप शाखा प्रमुख डा.झलकशर्मा गौतमले कोभिशिल्डको पहिलो मात्रा लगाएको खोप कार्ड लिएर आउने सबैलाई दोस्रो मात्रा दिइने बताउनुभयो । उहाँले बाँकी रहेको खोप वैदेशिक रोजगारीमा जाने, अध्ययन अन्य प्रयोजनका लागि विदेश जाने व्यक्तिहरु, डाइलाइसिस गर्नुपर्ने र गरिरहेको बिरामी, अंग प्रत्यारोपण गरिएका व्यक्ति र क्यान्सर बिरामीलाई दोस्रो मात्राको सुनिश्चित गरेर पहिलो मात्रा दिइने बताउनुभयो । 

करीब १४ लाख ज्येष्ठ नागरिकहरुले कोभिशिल्डको दोस्रो मात्रा लगाउन बाँकी छ ।  ज्येष्ठ नागरिकहरुलाई गत चैतमा कोभिशिल्डको पहिलो मात्रा लगाइएको थियो । भारतले अन्य देशहरुलाई खोप नदिने बताएपछि सरकारले खरिद गरिसकेको खोपमध्ये १० लाख डोज खोपसमेत ल्याउन नपाएपछि कोभिशिल्डको पहिलो मात्रा लगाएको ४ महिनापछि एष्ट्राजेनिकाको खोप दिन लागिएको हो ।