नेपाललाई सिकलसेलविरुद्धको खोप प्राप्त, थारू समुदायलाई चाँडै निःशुल्क प्रदान गरिने

नेपालले सिकलसेलविरुद्धको खोप प्राप्त गरेको छ । थारू समुदायको वंशाणुगत समस्या सिकलसेलविरुद्धको खोप भारतले नेपाललाई हस्तान्तरण गरेको हो ।

नेपालका लागि भारतीय राजदूत नवीन श्रीवास्तवले स्वास्थ्य तथा जनसङ्ख्या मन्त्री प्रदिप पौडेललाई शुक्रबार खोप हस्तान्तरण गर्नुभएको हो ।

प्राप्त खोप सिकलसेल एनिमिया तथा थालसिमियाका बिरामीका लागि निःशुल्क उपलब्ध गराइनेछ ।

भारतले चार लाख डलर मूल्य बराबरको खोप उपलब्ध गराएको हो । 

सिकलसेल एनिमियिा तथा थालसिमिया प्रभावित क्षेत्रका सरकारी अस्पतालहरूमार्फत् खोप वितरण गरिने मन्त्रालयका प्रवक्ता डा.प्रकाश बुढाथोकीले बताउनुभयो । 

थारू समुदाय बहुल बसोबास रहेको बाँके, बर्दिया, कैलाली तथा दाङका बिरामीहरुलाई भ्याक्सिन वितरण गर्ने तयारी मन्त्रालयको इपिडिमियोलोजी तथा रोग नियन्त्रण महाशाखाले गरेको छ । भेरी अस्पताल, सेती प्रादेशिक अस्पताल, राप्ती स्वास्थ्य विज्ञान प्रतिष्ठानसँगै टिकापुर अस्पताललगायतका संघीय, प्रदेश तथा पालिकास्तरका अस्पतालमा समेत बिरामीहरूका लागि उपलब्ध गराउने गरी तयारी गरिएको छ । 

‘आवश्यकता परेका तथा उपचार हुने सबै ठाउँमा भ्याक्सिन उपलब्ध गराइनेछ,’ प्रवक्ता डा. बुढाथोकीले भन्नुभयो ।

सिकलसेल नेपालका थारू समुदायमा वंशाणुगत रोगका रूपमा रहेको छ । यसको हालसम्म औषधि उपलब्ध भैसकेको छैन ।  रोगका कारण बिरामीहरुको प्रतिरोध क्षमता कमजोर भएर निमोनिया, मेनिन्जाइटिसलगायतका रोग लाग्ने जोखिम उच्च रहेकाले जोगिन खोप वितरण गर्ने तयारी सरकारले गरेको हो ।