काठमाडौं केन्द्रित स्वास्थ्य सेवालाई बाहिर लैजानुपर्छ : अर्थमन्त्री शर्मा
अर्थमन्त्री जनार्दन शर्मा ‘प्रभाकर’ले काठमाडौं केन्द्रित स्वास्थ्य सेवालाई सबै स्थानमा लैजानुपर्ने बताउनुभयो । बजेट प्रतिस्थापन विधेयकका सम्बन्धमा बिहीबार अर्थ मन्त्रालयमा अन्य मन्त्रालयका सचिवहरूको सुझाव संकलन गर्ने क्रममा यस्तो बताउनुभएको हो ।
उहाँले काठमाडौं केन्द्रित स्वास्थ्य सेवाका भएकाले यसमा परिमार्जन गरिने बताउनुभयो ।‘साधन स्रोत कहाँ केन्द्रित गर्ने हो ? स्वास्थ्य सेवाका लागि सबै काठमाडौं आउने होइन, काठमाडौं बाहिर पनि पाउने व्यवस्था गर्नुप¥यो’, उहाँले भन्नुभयो, ‘सबै काठमाडौं केन्द्रित गर्ने गरी होइन । स्वास्थ्य क्षेत्रका कतिपय कार्यक्रम परिमार्जन गर्नुपर्छ भन्ने मलाई लागेको छ ।’
उहाँले बजेटका कतिपय कार्यक्रम परिमार्जन गरी प्रतिस्थापन विधेयक ल्याइने बताउँदै सबै नागरिकले समान रूपमा पोषणयुक्त खानेकुरा तथा स्वास्थ्यमा पहुँच पाउनुपर्नेमा जोड दिनुभयो ।
बुधबार माधव नेपाल नेतृत्वको नेकपा (एकीकृत समाजवादी) र महन्थ ठाकुर नेतृत्वको लोकतान्त्रिक समाजवादी पार्टीले दल दर्ताको प्रमाणपत्र पाएपछि बजेट प्रतिस्थापन विधेयकको तयारी तीव्र बनेको हो ।
तपाईँको अभिमत