आफै स्कुटर चलाएर बयोधा अस्पताल पुगेका युवकको मृत्यु भएपछि आफन्त आन्दोलित

हेल्थपाटी
मंसिर २५, २०८२ १३:०५ मा प्रकाशित

अ + अ -

राजधानीको बल्खुस्थित बयोधा अस्पतालमा एक युवकको मृत्यु भएपछि आफन्तहरू आन्दोलित भएका छन् । केपिलासगढी गाउँपालिका–४, खोटाङका २६ वर्षीय प्रभिसन राईको चिकित्सकको लापरबाहीका कारण मृत्यु भएको भन्दै आफन्त आन्दोलित भएका हुन् ।

राई मंगलबार राति करिब १२ बज्न लाग्दा आफैले डबल लोड स्कुटर चलाएर अस्पतालको इमेर्जेन्सी पुगेका थिए । राईसँगै अस्पताल पुग्नुभएकी हेमा मगरका अनुसार राईलाई सामान्य घाटी दुखेको थियो ।

‘सबै सुतिसकेका थियौँ । घाँटी अलि दुख्यो अस्पताल जाउँ भनेर उहाँले नै स्कुटर चलाएर अस्पताल आयौँ’, मगरले भन्नुभयो, ‘इमेर्जेन्सीमा केही औषधि गरेन तर वार्डमा बस्यौँ । पछि बिरामीको अवस्था जटिल भएर 'शेकिङ' हुन थालेपछि चाहिँ त्यसलाई रोक्ने भन्दै इन्जेक्सनबाट औषधि दिएको थियो ।’ कस्तो औषधि वा कुन औषधि भनेर अहिलेसम्म कुनै कागज वा प्रमाण केही नदिइएको मगरको भनाइ छ ।

आफन्तले भर्ना गर्दा दिइने पुर्जा तथा अन्य रिपोर्टका कागज माग्दासमेत अस्पतालले नदिएको बताएका छन् । अस्पतालले मृत्युको कारण लिखित रिपोर्ट दिनुपर्ने माग गरेका छन् । साथै उपचारमा संलग्न चिकित्सको छानबिन गरी लाइसेन्स खारेज गर्न समेत माग गरेका छन् ।

यसबारे अस्पतालले प्रतिक्रिया दिन मानेका छैन ।

अहिले अस्पताल प्रशासन, मृतक राईका आफन्त, खोटाङका अगुवासहित वार्ता भइरहेको छ । अस्पताल बाहिर भने आफन्तले नारा लगाइरहेका छन् । अस्पताल परिसरमा प्रहरीले सुरक्षा दिइरहेको छ ।

राई दिदी तथा भाइसँग कपनमा बस्दै आउनुभएको थियो । उहाँ क्रोएसिया जाने तयारीमा हुनुहुन्थ्यो ।