चिकित्सक संघका महासचिव डा. तिवारीविरुद्ध अदालतको अवहेलना मुद्दा, चिकित्सकले चलाए— ‘म पनि सन्जिब तिवारी’ अभियान

नेपाल चिकित्सक संघका महासचिव डा. सन्जिब तिवारीविरुद्ध उच्च अदालत पाटनमा अवहेलना मुद्दा परेको छ । उहाँविरुद्ध उपभोक्ता हित संरक्षण मञ्चले मुद्दा हालेको हो । 

मञ्चले उपभोक्ता अदालतको पूर्णपाठ नआउँदै आदेशको विषयमा टिप्पणी गरेको, चिकित्सक संघको महासचिवका नाममा विज्ञप्ति निकालेको भन्दै अदालतको अवहेलाना मुद्दा दायर गरेको हो ।

सो मुद्दासँगै चिकित्सक र स्वास्थ्यकर्मीहरू डा. तिवारीको पक्षमा उभिएका हुन् । योसँगै चिकित्सक र स्वास्थ्यकर्मीले ‘म पनि सन्जिब तिवारी’ भनेर सामाजिक सञ्जालमा अभियान चलाएका छन् । 

डा. तिवारीको फोटोमो यस्तो लेखेर ‘ह्यास्टट्याग आइएम विथ सन्जिब तिवारी’ अभियान चलाएका छन् । 

सोही मुद्दामा उच्च अदालतका न्यायाधिकद्वय श्यामकुमार भट्टराई र हेमन्त रावलको इजलासले ७ दिनभित्र लिखित जवाफ लिई आफैं अदालतमा उपस्थित हुन र सम्बन्धित निर्णय फायल समेत लिएर आउन आदेश दिएको छ। 

उपभोक्ता अदालतबाट पछिल्लो समय अस्पताल र चिकित्सकहरुमाथि क्षतिपूर्ति तिराउने फैसला भएपछि चिकित्सक संघले संस्थागत रुपमा र अन्य संघसंस्थाहरुले र चिकित्सकहरुले त्यसलाई सच्याउन माग राख्दै आएका छन्।

त्यस्तै उनीहरूले उपभोक्ता संरक्षण ऐनको व्यवस्था संशोधन गर्नुपर्ने माग राख्दै आन्दोलन गरिरहेका छन् । चिकित्सकहरूले हातमा कालो पट्टी बाँधेर सेवा दिँदै ७२ घण्टे आन्दोलन गरिरहेका छन् ।