एमबीबीएस परीक्षाको नतिजा आयाे तर मार्कसिट छैन

चिकित्सा शास्त्र अध्ययन संस्थान (आइओएम)ले गत साउनमा लिएको एमबीबीएस परीक्षाको नतिजा सार्वजनिक भएपनि मार्कसिट हेर्न नपाउँदा विद्यार्थीहरु समस्यामा परेका छन् । गत साउन १० गतेदेखि सञ्चालन गरिएको एमबीबीएस तृतिय फेज पाचौं वर्षको परीक्षाको नतिजा गत मंसिर २ गते सार्वजनिक भएको छ । तर, विद्यार्थीहरुले आफ्नो मार्कसिट हेर्न नपाउदा उनीहरु अन्यौल्मा परेका छन् ।

यसअघि नतिजा प्रकाशित भएकै दिन आफ्नो नाम र रोल नम्वरबाट अनलाइन मार्फत नतिजाको पुरा विवरण हेर्न सकिने व्यवस्था थियो तर अहिले अनलाइन मार्फत नतिजा हेर्न नमिल्ने भएपछि विद्यार्थीहरु तनावमा छन् । 

नतिजामा पास र फेल मात्रै हेर्न मिल्यो तर हातमा मार्कसिट नपर्दा पास भएका विद्यार्थीहरुले कुन विषयमा कति नम्वर तथा फेल भएका विद्यार्थीहरुले कुन विषयमा फेल भएको भन्ने थाहा पाउन सकिएन जसले गर्दा आफुहरु थप तनावमा रहेको गण्डकी मेडिकल कलेजका एक विद्यार्थीले गुनासो गर्नुभयो । 

‘यसअघि नतिजा आएलगत्तै विवरण हेर्न मिल्थ्यो तर अहिले त्यो अनलाइन प्रणाली पनि हटाइएको छ, आइओएमको परीक्षा शाखामा मार्कसिटबारे बुझ्दा फोन उठ्दैन । हामी अन्यौलमा छौं, ’ ति विद्यार्थीले भन्नुभयो । 

नेपाल मेडिकल काउन्सिल, नेपाली कांग्रेसको चुनाव लागिरहेकाले मार्कसिटको टुंगो छैन भन्ने हल्ला भइरहेको ति विद्यार्थीले बताउनुभयो ।बेलैमा मार्कसिट हात नपर्दा पास भएका विद्यार्र्थीहरुले इन्टर्नको लागि आवेदन दिन नपाएकाे तथा मेडिकल काउन्सिलमा दर्ताका लागि म्याद नाघ्ने चिन्ता थपिएको छ  भने फेल भएका विद्यार्थीले पुन तयारी गर्न अप्ठेरो परेको विद्यार्थीहरुले गुनासो गरेका छन् ।

आइओएम परीक्षा शाखा प्रमुख भोला सिग्देलले भने भोली सम्ममा सबै कलेजहरुमा मार्कसिट पठाउने तयारी भएको बताउनुहुन्छ ।