न्युजिल्याण्डले १२ देखि १५ वर्षसम्मकालाई कोरोनाको खोप दिने
हेल्थपाटी - आषाढ ०९, २०७८ १७:३५ मा प्रकाशित
अ +
अ -
काठमाडौं । न्युजिल्याण्डमा १२ देखि १५ वर्षसम्मका किशोरकिशोरीहरूलाई पनि कोरोना भाइरसविरुद्धको खोप लगाइने भएको छ । न्युजिल्याण्डको औषधि नियामक निकायले फाइजर खोप सो उमेर समूहलाई लगाउन सकिने निष्कर्ष निकालेको हो ।
यस सम्बन्धमा औषधि नियामक निकायले गरेको सिफारिसलाई मन्त्रिपरिषद्ले आगामी हप्ता पारित गर्ने अपेक्षा गरिएको अधिकारीहरूले जानकारी दिएका छन् ।
प्रधानमन्त्री जसिन्डा अर्डेर्नले मन्त्रिपरिषद्बाट यो प्रस्ताव पारित गरेपछि १२ देखि १५ वर्षसम्मका किशोरकिशोरीहरूलाई खोप लगाउन थालिने भएको छ ।यस वर्षको अन्त्यसम्ममा उनीहरूलाई खोप लगाएर सकिने अनुमान गरिएको छ ।
अहिलेसम्म कोरोना भाइरसका कारण बालबालिकाहरूमा परेको असर तुलनात्मक रूपमा कम देखिएको छ । विशेष गरेर उनीहरूलाई गम्भीर बनाएका घटना पनि कम भएको अधिकारीहरूले जनाएका छन् । तर पनि उनीहरूलाई खोप लगाउनुपर्ने आवश्यकता देखिएको छ । उनीहरूलाई खोप लगाउने पर्ने मुख्य दुई कारण ठानिएको छ ।
पहिलो कारण– उनीहरूलाई धेरै असर नपरे पनि अरुलाई सार्न सक्ने सम्भावना रहने भएकाले खोप लगाउनुपर्ने सुझाव आएको छ । अर्को, बालबालिकालाई अहिले मृत्युकै घटना नभए पनि त्यसले दीर्घकालीन असर भने पर्ने देखिएको छ ।
किशोरकिशोरीहरूलाई खोप लगाउने निर्णय अन्य केही देशहरूले गरिसकेकाले न्युजिल्याण्डले पनि त्यस्तो निर्णय गर्न लागेको हो । रासस
तपाईँको अभिमत