निर्दोष हुँदाहुँदै चार दिन हिरासत बस्नुभएका डाक्टर भन्नुहुन्छ : समाजले मलाई कसरी पत्याउँछ ? (भिडियो)
जगन्नाथ ढकाल- श्रावन ३०, २०८० २०:२० मा प्रकाशित
अ +
अ -
केन्द्रीय अनुसन्धान ब्युरो (सीआईबी)ले शैक्षिक प्रमाणपत्र नक्कली प्रकरणमा प्रतिनिधिसभा सदस्य (सांसद) सुनिल शर्मासहित ७ जना डाक्टरलाई पक्राउ गर्यो ।
पक्राउ परेकामध्ये प्रतिनिधिसभा सदस्य शर्मा बाहेक अन्यलाई थुनामा राखेर अनुसन्धान गर्न जिल्ला अदालत काठमाडौंले म्याद थप अनुमति दिएको छ ।
एसएलसी र प्लस टुका मार्कसिट कीर्ते गरेर एमबीबीएस अध्ययन गरेका ‘नक्कली’ डाक्टरहरूमाथि सीआईबीले अपरेसन चलाएको थियो । सोही क्रममा साउन २५ गते दिउँसो डा. रञ्जितकुमार यादव पनि प्रक्राउ पर्नुभयो ।
महोत्तरी पिपरा गाउँपालिकाका २९ वर्षीय यादव एमडीको तयारी गर्दै हुनुहुन्छ । लोकन्थलीमा डेरा गरी बस्नुभएका डा. यादवलाई सीआइबीको टोलीले डेरा नजिकैबाट प्रक्राउ गरेको थियो ।
निर्दाेष रहेको र यसबारे थप अनुसन्धान गर्न अनुरोध गर्दा सिआइबीले आफू र आफ्नो पेसामाथि दुर्व्यहार र अपशब्द प्रयोग गरेको बस्नेतले बताउनुभएको छ ।
तर पक्राउ गर्दा उहाँलाई कारण थाहा दिइएन । प्रहरीलाई आफ्नो कसूर सोध्दा राती १० बजेसम्म जवाफ पाउनुभएन । जब आफू नक्कली शैक्षिक प्रमाणपत्रको कसूरमा प्रक्राउ परेको थाहा पाउनुभयो छाँगाबाट खसेझैँ हुनुभयो । कुन प्रमाणपत्रमा के गडबडी भयो भन्ने सोच्न थाल्नुभयो ।
२०६५ सालमा जनकपुरस्थित सिद्धार्थ शिशु सदनबाट एसएलसी परीक्षा दिएको, काठमाडौंको तिनकुनेमा २०६७ सालमा पेन्टागन इन्टरनेशन कलेजमा प्लस टु पास गरेको/पढेको, अनि २०६८ सालदेखि सुरु गरिएको डाक्टरी अध्ययनको आफ्नो यात्रा सम्झन थाल्नुभयो । २०७५ सालमा नेपाल मेडिकल काउन्सिलले लिएको लाइसेन्स परीक्षा उत्तिर्ण भएको स्मरण गर्नुभयो । जुन प्रमाणपत्रका आधारमा उहाँ प्रक्राउ पर्नुभएको थियो, त्यो उहाँलाई देखाइएको थिएन । त्यसैले उहाँले आफ्नो अध्ययनको यात्रामा कहाँ, कुन प्रमाणपत्रमा गडबडी भयो भन्ने मात्रै सोचिरहनुभयो ।
यादवको कागाजात सक्कली भएको पाइएपछि साउन २८ गते उहाँ रिहा भइसक्नु भएको छ । उहाँले अनाहकमा ३ दिन ४ रात हिरासतमा बस्नुपर्यो, 'नक्कली डाक्टर'को ट्याग लाग्यो । मानसिक तनाव खेप्नपर्यो । मानिसहरू डाक्टरलाई भगवानसरह मानेको देखेर सम्मानित पेसा मानी डाक्टरी पढ्नुभएका यादवलाई नभएको अभियोग लगाइँदा ग्लानी लाग्न थाल्यो । आफू निर्दाेष हुँदाहुँदै पनि ४ दिनसम्म हिरासतमा बस्नुपर्दा उहाँ विक्षिप्त हुनुहुन्छ ।
प्रक्राउ पर्दा उहाँसँगै साथी नभएको भए उहाँ अझै कति दिन हिरासतमा बस्नुपर्थ्यो थाहा थिएन । प्रक्राउ परेको कुरा साथीले अन्य साथीलाई जानकारी गराएपछि डा. यादवको प्रमाणपत्रका सम्बन्धमा सोधखोज भयो । त्यसै क्रममा नेपाल चिकित्सक संघ काउन्सिल मेम्बर डा. रबिन बस्नेतले निर्दाेष व्यक्तिलाई पक्राउ गरिएको भन्दै उहाँको रिहाईका लागि सहयोग गर्नुभयो ।
काउन्सिलदेखि सीआइबीसम्म जानुभयो । अन्तत: डा. यादव निर्दाेष सावित हुनुभयो । निर्दाेष रहेको र यसबारे थप अनुसन्धान गर्न अनुरोध गर्दा सीआइबीले आफू र आफ्नो पेसामाथि दुर्व्यहार र अपशब्द प्रयोग गरेको बस्नेतले बताउनुभएको छ । अनुसन्धानमा खटिएका एक उच्च अधिकारीले 'डाक्टरहरू चोर हुन्' भन्दै हप्की-दप्की गरेको उहाँले हेल्थपाटीलाई जानकारी दिनुभएको छ ।
रञ्जित कुमार यादव नाम गरेका अर्का नक्कली डाक्टरलाई पक्राउ गर्नुपर्नेमा सीआईबीले नक्कली भन्दै सक्कली डाक्टर यादवलाई पक्राउ गरेको खुलिसकेको छ । सीआइबीले नेपाल मेडिकल काउन्सिलले उपलब्ध गराएको कागजातकै आधारमा यादवलाई पक्राउ गरिएको र पछि काउन्सिलबाट भुलबस यादवको प्रमाणपत्र प्रतिलिपी संलग्न गरी पठाएको जानकारी गराएपछि सीआइबीले यादवलाई रिहा गरिसकेको छ ।
आज हामीले डा. रञ्जितकुमार यादव र उहाँको रिहाईका लागि सहयोग गर्नुभएका डा. रबिन बस्नेतसँग विस्तृतमा कुरा गरेका छौँ ।
विस्तृत भिडियोमा :
तपाईँको अभिमत