नर्सिङ/मिडवाइफ कार्यक्रममा सरकारी कोटा घटाइएकोप्रति गोनानको ध्यानाकर्षण

चिकित्सा शिक्षा आयोगले स्नातकोत्तर तहमा नर्सिङ/मिडवाइफ कार्यक्रममा सरकारी कोटा घटाएकोप्रति सरकारी सेवामा आवद्ध नर्सहरुको संघ नेपाल गोनानले आफ्नो ध्यानाकर्षण भएको जनाएको छ । 

गोनानले प्रवेश परीक्षा लिनुअघि अघिल्लो वर्षको प्रावधान अनुसार ४० प्रतिशत सिट छुट्याएको र पछि ओपन हाउस म्याचिङ गरिसकेपछि आयोगले आफ्नो पहिलाको सूचना संसोधन गरि ३० प्रतिशतमा झारी अर्काे सूचना निकाल्नु गम्भिर त्रुटि भएको जनाएको छ । 
साथै यसअघि सरकारी संसथमा कार्यरत स्वास्थ्यकर्मीहरुले निजी मेडिकल कलेजमा पनि पढ्न पाउने व्यवस्था रहेकोमा त्यसलाई संसोधन गरि सरकारी संस्थामा कार्यरत स्वास्थ्यकर्मीहरुले सरकारी कलेजमा मात्रै पढ्न पाउन व्यवस्था गरिएको जनाउँदै गोनानले यसले सरकारी कोटा अत्यन्तै कम भएको बताएको छ । 

गोनानले स्वास्थ्य तथा जनसंख्या मन्त्रालयलाई ध्यानाकर्षण पत्र बुझाउदै त्रुटि सच्याउन आग्रह गरेको छ । गोनानकी अध्यक्ष कल्पना श्रेष्ठले आयोगको यो त्रुटिका कारण सरकारी संस्थामा कार्यरत स्वास्थ्यकर्मीहरुको मनोबल घटेको बताउनुभयो । परीक्षा अगाडिको सूचनाअनुसार परिक्षार्थीले तयारी गरेको र धेरैजना पास भएपनि सिट संख्या घ्टदा स्वास्थ्यकर्मीहरुले सरकारी कोटाबाट वञ्चित भएको उहाँले बताउनुभयो । 
आयोगले माघ ८ गते परीक्षा लिएको थियो । शैक्षिक सत्र २०७७/०७८ मा मा सरकारी संस्थामा काम गर्ने स्वास्थ्यकर्मीलाई ४० प्रतिशत सिट छुट्याएको थियो । अहिलेको शैक्षिक सत्रमा उक्त त्यो सिट संख्या घटाएर ३० प्रतिशतमा झारिएको छ ।