अस्पतालको मानवीयता खोइ ? गम्भीर संक्रमितलाई दिँदैनन् बेड !

काठमाडौं। नयाँ बानेश्वर बस्दै आउनु भएका रुकुम मुसीकोटका ३८ वर्षीय युवकलाई एक्कासी उच्च ज्वरो आयो। आफन्तका अनुसार उहाँलाई एकदमै कमजोर महसुस भयो । उहाँलाई गत २७ असोजमा संक्रमण पुष्टि भएको रिपोर्ट प्राप्त भएको थियो । उहाँ आफन्तसहित वीर अस्पताल पुग्नुभयो। तर, अस्पतालले बेड नभएको प्रतिकृया दिएपछि कोठामै बस्न बाध्य हुनुभयो। उहाँका आफन्तले भन्नुभयो, ‘के गर्नु अस्पतालले भर्ना गर्दैन ? अब डाक्टरलाई देखाएर कोठामै हेरचाह गर्नुपर्ला।’ 

केहिदिन अघिको नियमित पत्रकार सम्मेलनमा स्वास्थ्य मन्त्रालयका प्रवक्ता डा. जागेश्वर गौतमले जोखिम अवस्थामा मात्रै अस्पताल जान आग्रह गर्नुभएको थियो। तर अस्पतालहरुले गम्भीर प्रकृतिका संक्रमितहरुलाई शैय्या दिन आनाकानी गर्दै आएपछि होम आइसोलेसनमा बस्नेको संख्या बढ्दै गएको छ।

अस्पतालमा बेड नपाएपछि उनीहरु ज्यानै जोखिममा हालेर होम आइसोलेसनमा बस्न बाध्य भएका छन्। अस्पतालहरुले आइसीयू र भेन्टिलेटर भए पनि लुकाउँदा स्वास्थ्य तथा जनसंख्या मन्त्रालयले प्रभावकारी तवरले अनुगमन गर्न सकेको छैन। 

दीर्घरोगी र जेष्ठ नागरिकहरू जोखिममा रहेका छन्। संक्रमण बढ्दै जाँदा दीर्घरोगीहरूलाई जटिल समस्या हुँदा पनि अस्पतालले शैय्या दिन आनाकानी गर्दै आएका छन्। जसकारण उनीहरु रोग पालेर बस्न विवश छन्।

उच्च रक्तचापका बिरामीमा कोरोना भाइरस संक्रमणको जोखिम उच्च हुने भन्दै स्वास्थ्य मन्त्रालयका प्रमुख विशेषज्ञ महेन्द्र श्रेष्ठले सावधानी अपनाउन आग्रह गर्नुभयो। 

कोरोना भाइरस संक्रमितको संख्या पछिल्लो केहि साता यता ह्वात्तै बढेको छ। शनिबार देश ३ हजार १६७ जना कोरोना संक्रमित थपिएका छन् । यो संगै संक्रमितको संख्या एक लाख २९ हजार ३ सय चार पुगेको छ। 

यस्तै, आइसीयू र भेन्टिलेटरमा उपचार गराउनुपर्ने संक्रमितको संख्या पनि बढ्दै गएको छ। शनिबार देशभर २९० जना आइसीयू र ६६ जना संक्रमित भेन्टिलेटरमा उपचाररत छन् । 

राजधानी दैनिकमा प्रशान्त वलीले लेख्नुभएको समाचारबाट ।