बालक्यान्सरको उपचारमा प्रयोग हुने ३५ थरी औषधि निशुल्क दिने तयारी
जगन्नाथ ढकाल- आषाढ ०६, २०८० १२:४२ मा प्रकाशित
अ +
अ -
नेपालमा बाल क्यान्सरको उपचारमा प्रयोग हुने ३५ प्रकारका औषधि निशुल्क पाइने भएको छ । विश्व स्वास्थ्य संगठनको ‘ग्लोबल इनिसियटिभ फर चाइल्डहुड क्यान्सर’ कार्यक्रम अन्तर्गत नेपाललाई निशुल्क औषधि उलब्ध हुन लागेको स्वास्थ्य तथा जनसंख्या मन्त्रालयले जानकारी दिएको छ ।
३५ प्रकारका निशुल्क औषधि ल्याउनका लागि काम भइरहेको स्वास्थ्य मन्त्रालय नीति योजना तथा अनुगमन महाशाखामा प्रमुख डा.कृष्ण पौडेलले जानकारी दिनुभयो । डा.पौडलका अनुसार विश्व स्वास्थ्य संगठन अन्तर्गत युनिसेफ र अमेरिकाको सेन्ट जुड चिल्ड्रेन्स हस्पिटल एण्ड रिसर्च सेन्टरको सहकार्यमा विश्वका ११ देशमा बाल क्यान्सरको निशुल्क औषधि दिन लागिएको छ ।
प्राथमिकतामा राखिएका ११ देशमा नेपाल पनि परेकाले नेपालले निशुल्क औषधि प्राप्त गर्नेछ ।
यसका लागि विशेष गरी अमेरिकाकाे सेन्ट जुड अस्पतालले रकमको जोहो गर्नेछ ।
सेन्ट जुडले विश्व स्वास्थ्य संगठनसँग मिलेर ‘ग्लोबल प्लेटफर्म फर एक्सेस टु च्याइल्डहुड क्यान्सर मेडिसिन’ परियोजना अन्तर्गत औषधि वितरण गर्न लागेको हाे ।
नेपालमा यो औषधि आएपछि बाल क्यान्सरको उपचार हुने सरकारी अस्पताललाई उपलब्ध गराइने डा.पौडेलले जानकारी दिनुभयो ।
अहिले कान्ति बाल अस्पताल, भरतपुर क्यान्सर अस्पताल, भतपुर क्यान्सर, सुशिल काइराला प्रखर क्यान्सर अस्पताल बाँके, पाटन अस्पतालमा उक्त औषधि उपलब्ध गराइनेछ।
‘जहाँ–जहाँ बच्चाका क्यान्सरको उपचार हुन्छ, त्यहाँ बच्चाको नियमित खोप बाँडेको जस्तै गरी ३५ प्रकारको औषधि ल्याउने तयारी छ’ पौडेलले भन्नुभयो ।
अहिले नेपालमा कुन–कुन क्यान्सर बढी आउँछन् ? कुन क्यान्सरमा हाम्रो डाइग्नोसिस तथा उपचारको क्षमता कस्तो छ भन्नेमा काम भइरहेको डा.पौडेलले बताउनुभयो ।
यस विषयमा छलफल गर्न असार १३ र १४ गते नेपालका सबै साझेदार डब्लुएचओ युनिसेफका प्रतिनिधि लगायतसँग बैठक बस्ने कार्यक्रम राखिएको पनि पौडेलले जानकारी दिनुभयो ।
यसरी ३५ प्रकारका औषधि आएपछि बालबालिकाको क्यान्सर उपचारमा महंगो औषधि खरिद गनुपर्ने समस्या समाधान हुने डा.पौडेलको भनाइ छ । मुख्य खर्च औषधिमा हुने भएकाले बीचैमा उपचार छाडेर जाने समस्या कम हुने र निको हुने दर पनि धेरै बढ्ने विश्वास डा.पौडेलको छ ।
बाल क्यान्सरको उपचारमा प्रयोग हुने ३५ प्रकारका औषधि निशुल्क दिनसके नेपालका लागि ठूलो उपलब्धी हुने पाैडेलको दावी छ ।
उहाँका अनुसार यो औषधि स्वास्थ्य सेवा विभागको व्यवस्थापन शाखामार्फत वितरणा गरिनेछ।
दशैँअघि सम्म औषधि ल्याउने गरी तयारीमा लागेको पनि डा.पौडेलले जानकारी दिनुभयो ।
बाल क्यान्सरको मुख्य उपचार हुने सरकारी अस्पताल नै भएको र गरिब पनि सरकारीमै उपचार गर्न आउने भएकाले सुरुमा सरकारीमा मात्रै निशुल्क औषधि उपलब्ध हुनेछ ।
पछि औषधि वितरणको सहजताका लागि राखिएका सेयर एण्ड केयर सेन्टरहरुमा पनि निशुल्क औषधि उपलब्ध हुनसक्ने पौडेलले जानकारी दिनुभयो ।
नेपालमा वार्षिक ७०० देखि ८०० सम्म बालबालिकामा क्यान्सर पत्ता लाग्ने कान्ति बाल अस्पतालका वरिष्ठ बालक्यान्सर रोग विशेषज्ञ डा.सुधीर सापकोटाले जानकारी दिनुभयो । उहाँका अनुसार कान्तिमा मात्रै वार्षिक करिब २०० बालबालिकामा क्यान्सर पत्ता लाग्ने गरेको छन् ।
नेपालमा धेरै क्यान्सर हुनेमा रक्त क्यान्सर(लुकिमिया) आँखाको क्यान्सर(रेटिनोब्लास्टोमा), मिर्गौलाको क्यान्सर, स्नायु तन्तुहरुको क्यान्सर(न्यूरोब्लास्टोमा), ग्रन्थीहरुको क्यान्सर(लिम्फोमा) लगायत रहेको डा.सापकोटाले जानकारी दिनुभयो ।
डा.सापकोटाको अनुमानमा क्यान्सर पत्ता लागेकामध्ये करिब २५ प्रतिशतले खर्च अभावका कारण बीचैमा उपचार छाड्ने गरेका छन् ।
डा.सापकोटाका अनुसार क्यान्सरको प्रकार तथा बालबालिकाको अवस्थाअनुसार उपचारमा ६ महिनादेखि २, ३ वर्षसम्म लाग्छ । उपचार खर्च ५ देखि १० लाख लाग्छ ।
उपचार छाड्नुका मुख्य कारण खर्च अभाव नै रहेको र त्यसमा पनि औषधिमा धेरै खर्च हुने डा.सापकोटा बताउनुहुन्छ ।
३५ प्रकारका औषधि निशुल्क आएमा उपचारमा निकै सहज हुने उहाँको भनाइ छ ।
तपाईँको अभिमत