रुकुमको चौरजहारीमा सुरु भयो अक्सिजन उत्पादन
गोपाल रेग्मी- भाद्र २४, २०७८ १७:३२ मा प्रकाशित
अ +
अ -
कर्णाली प्रदेशको रुकुम पश्चिममा अक्सिजन उत्पादन सुरु भएको छ।
चौरजहारी नगरपालिका–१ मा रहेको चौरजहारी अस्पतालमा जडान गरिएको अक्सिजन प्लान्टबाट अक्सिजन उत्पादन सुरु भएको अस्पतालले जानकारी दिएको छ ।
चौरजहारी नगरपालिकाको १ करोड १० लाख रुपैयाँ लगानीमा अक्सिजन प्लान्ट जडान भएको अस्पतालका प्रशासक डिलबहादुर गिरीले जानकारी दिनुभयो ।
गिरीका अनुसार अस्पताल परिसरमा प्लान्ट जडानका लागि करिब साढे २ लाख रुपैयाँ अस्पतालले लगानी गरेको थियो । नगरपालिकाले नै अक्सिजन प्लान्ट बनाए पनि सञ्चालन गर्न सहज होस भनेर चौरजहारी अस्पतालमा जडान गरिएको अस्पतालका प्रशासक गिरीले बताउनु भयो ।
चौरजहारीमा दुईदिनदेखि अक्सिजन उत्पादन भइरहेको हो । यस प्लान्टमा दैनिक ३६ वटा सिलिन्डरसम्म भर्ने क्षमता रहेको उहाँले जानकारी दिनुभयो ।
कोरोना महामारीको दोस्रो भेरियन्ट व्यापक बनेका बेला जिल्लामा अक्सिजनको हाहाकार भएको थियो । कारोना महामारीको नयाँ लहर आएको खण्डमा अक्सिजनका लागि भौतारिनु पर्ने समस्या नरहेको गिरीको भनाइ छ ।
यस अक्सिजन प्लान्टले रुकुम पश्चिमसहित सल्यान, जाजरकोट र अन्य छिमेकी जिल्लामा समेत अक्सिजन आपूर्ति गर्ने लक्ष्य राखिएको छ ।
तपाईँको अभिमत