भेरी घटना : ३ जना विरुद्ध किटानी जाहेरी, काममा फर्किए स्वास्थ्यकर्मी
काठमाडौं । भेरी अस्पतालमा ड्युटीमा रहेका डाक्टर र नर्सलाई लखेटी लखेटी पिटेका दोषी विरुद्ध किटानी जाहेरी दिइएको छ ।
घटनामा संलग्नमध्ये लोकबहादर रावत, मानबहादुर रावत र भरत रावत विरुद्ध किटानी जाहेरी दिइएको छ ।
यी ३ जना प्रहरी नियन्त्रणमा रहेको र अन्यको संलग्नताको विषयमा थप अनुसन्धान गरि कानुनी कारवाहीको दायरामा ल्याउन किटानी जाहेरीसहित आवश्यक कानुनी कारबाहीको प्रक्रिया अगाडि बढी सकेकाले आन्दोलनरत सम्पूर्ण चिकित्सक, स्वास्थ्यकर्मी तथा कर्मचारीहरुलाई आ–आफ्नो जिम्मेवारीमा फर्कन अस्पताल विकास समितिले अपिल गरेको छ ।
तीन दिनभित्र दोषीलाई कारबाहीको प्रक्रिया अघि बढाउन स्वास्थ्यकर्मीहरुले प्रशासनलाई अल्टिमेटम दिएका छन् । यदि उक्त समयसम्म कारबाही प्रक्रिया अघि नबढे सबै किसिमको आन्दोलनमा उत्रने स्वास्थ्यकर्मीहरुको चेतावनी छ ।
प्रशासन र अस्पताल विकास समितिबीच भएको वार्तामा कारबाही प्रक्रृया बढाउने सहमति भएसँगै बाँकेका आन्दोलित सबै स्वास्थ्यकर्मीहरु काममा फर्किएका छन् । अहिले भेरी अस्पतालमा स्वास्थ्यकर्मीको सुरक्षाका लागि २५ जना सुरक्षाकर्मी खटाइएको छ ।
अस्पतालमा शुक्रबार राती ८ वजेतिर बिरामीको मृत्युको विषयलाई लिएर मृतकका आफन्तहरुले आइसियु कक्षमै गएर डाक्टर तथा नर्सहरुमाथि सांघातिक आक्रमण गरेका थिए । उपचारका क्रममा साँझ ८ बजे कोभिड आईशोलेसन वार्डको आईसियु बेड न. १३ मा उपचारार्थ दाङका डिल्लीबहादुर रावतको मृत्यु भएको थियो ।
त्यसपछि मृतकका आफन्तहरुले ड्युटीमा खटिएका स्वास्थ्यकर्मीहरुलाई लखेटी लखेटी जहाँ भेटिन्छन् त्यहीँ लातीले हान्ने तथा घाँटी अठ्याउने जस्ता अमानवीय हर्कत देखाएका थिए । थप आक्रमण हुनबाट बच्न नर्सहरू भागेर शौचालयतर्फ जाँदा पनि त्यहाँ पनि लखेटेपछि एक डाक्टर र ३ जना नर्स ज्यान जोगाउन छतबाट हाम फाल्नुभएको थियो ।
ड्युटीमा डा.दिपक गुप्ता, डा.चन्द्रप्रकाश शाहु, डा।समा अनसारी, स्टाफ नर्सहरु आश्वीन गुरुङ, सदिक्षा गैरे र बन्दना श्रेष्ठ हुनुहुन्थ्यो । स्वास्थ्यकर्मीलाई अन्धाधुन्द कुटपिट गर्न थालेपछि झ्यालको सिसा फोडेर डा.शाहु, नर्सहरु सदिक्षा, बन्दना र आश्वीनले हामफालेर ज्यान जोगाउनुभएको छ ।
तपाईँको अभिमत