अहिले अर्को महामारीबाट बच्ने उत्तम समय हो

जेनेभा । अहिले अर्को महामारीबाट बच्ने उत्तम समय भएको संयुक्त राष्ट्रसंघको महासभामा सहभागी राष्ट्रहरूले बताएका छन् । कोभिड–१९ मात्र विश्वले भोग्ने स्वास्थ्य संकट नभएको भन्दै विश्व स्वास्थ्य संगठन (डब्लूएचओ)ले आयोजना गरेको भर्चुअल महासभाका सहाभागीले यस्तो बताएका हुन् ।

विश्वले यसअघि पनि ठुला महामारी झेले पनि पछि बिर्सिने चलन नै बसेको सहभागीले बताएका छन् । अब पहिले झेलेको पीडालाई बिर्सन नहुने भन्दै ‘प्यानिक देन फर्गेट’ साइकल तोड्नुपर्नेमा सहभागी राष्ट्रहरूले जोड दिएका छन् । यस्तो साइकल तोडेमा संकट व्यवस्थापन तयारीमा विकास गरी आइपर्ने संकटबाट बच्न सकिने बताइएको छ ।

‘वर्षौँदेखि ‘विश्व महामारीका लागि तयार छैन’ भन्ने कयौँ रिपोर्ट र सिफारिस हेर्दै अनि भन्दै आइरहेका छौँ’, डब्लूएचओका प्रमुख डा. टेड्रोस अधानम गेब्रियसले भन्नुभयो, ‘कोभिड–१९ ले सत्यलाई सामुन्ने ल्याइदियो, जब समय आयो विश्व अझै तयार थिएन ।’

प्रमुख टेड्रोसले सम्पूर्ण सरकार तथा सरोकारवालालाई पूर्व तयारीमा लगानी गर्न सुझाव दिनुभयो । ‘यो अन्तिम महामारी हुने छैन, नत अन्तिम विश्व स्वास्थ्य संकट नै’, उहाँले भन्नुभयो ।

सहभागी सम्पूर्ण राष्ट्रले महामारी व्यवस्थापन पूर्व तयारीमा लगानी गनुपर्ने बताए । एक अध्ययनका अनुसार पूर्व तयारीका लागि प्रतिव्यक्ति ५ अमेरिकी डलर वार्षिक खर्च हुन्छ । तर कोभिड–१९ व्यवस्थापनका लागि ११ ट्रिलियन अमेरिकी डलर खर्च भइसकेको छ ।