‘नर्सिङ संघको विकल्प खोज्ने वेला आएको सङ्केत देखियो’

नेपाल नर्सिङ संघको विकल्प खोज्ने वेला भएको सङ्केत देखा परेको आन्दोलनरत नर्सले बताएका छन् । नर्स तथा स्वास्थ्यकर्मी संघर्ष समितिकी प्रतिनिधि ज्योति रानाभाटले यस्तो बताउनुभएको हो ।

‘नर्सिङ सङ्घले नेतृत्व नलिनु भनेको अर्को वैकल्पिक शक्तिको आगमन र त्यसको आधिकारिकताको संकेत हो’, उहाँले सामाजिक सञ्जाल फेसबुकमा लेख्नुभएको छ, ‘त्यसैले सङ्घले नेतृत्व नलिँदा, सङ्घभन्दा बढी अन्य शक्तिहरूलाई फाइदा पुग्नेछ र ठूलो क्षति भने सङ्घलाई नै हुनेछ।’

रानाभाटले नर्सहरूको आन्दोलन नर्सिङ संघले नभई नर्सहरू आफैले सुरु गरेको भन्दै ‘संघको कमजोरीलाई बहाना बनाएर’ नर्सहरू पन्छिन नहुने बताउनुभएको छ । 

आन्दोलन सुरु भइसकेकाले यसको निकास सरकारले लिनुपर्ने उहाँको भनाइ छ । 

नर्सिङ संघ, अफिन, मेडिकल तथा डेन्टल कलेज संघलगायतले गत शनिबार (१५ गते) स्वास्थ्य मन्त्रालयमा गरेको सम्झौता आफूहरूलाई अमान्य भएको भन्दै नर्स तथा स्वास्थ्यकर्मी संघर्ष समितिले आन्दोलन यथावत गरेको छ । नर्सिङ संघलाई समेत दबाब दिएर आन्दोलनका कार्यक्रम यथावत गर्न बाध्य गरेको छ ।