‘नर्सको १२–१५ हजार तलबबाट ३४ हजार ५०० न्यूनतम तलब बनायौँ, यति ठुलो उपलब्धिमा कसैले ताली बजाएन’
हेल्थपाटी - माघ १५, २०८२ १८:१५ मा प्रकाशित
अ +
अ -
नर्स तथा स्वास्थ्यकर्मीहरूको तलब वृद्धि गर्नु ठुलो उपलब्धि भएको स्वास्थ्य तथा जनसङ्ख्या मन्त्री डा. सुधा शर्मा गौतमले दाबी गर्नुभयो । नेपाल नर्सिङ संघको ६४औँ वार्षिक साधारणसभाको उद्घाटन समारोहलाई सम्बोधन गर्नुहुँदै उहाँले नर्सको न्यूनतम तलब तोकेर सम्झौता गर्न सक्नु ठुलो उपलब्धि भएको बताउनुभएको हो ।
उक्त उपलब्धिलाई प्रशंसा र योगदानको रूपमा ग्रहण गर्न नगरिएको भन्दै उहाँले असन्तुष्टिसमेत व्यक्त गर्नुभयो । जेनजी विद्रोहपछि बनेको सरकार र केही समयपछि आफू मन्त्रालयमा आउँदा समेत नर्सहरूको आन्दोलन नरोकिएको अवस्थामा आन्दोलनकारीसँग र सरोकारवालासँगको बैठकपछि न्यूनतम तलब ३४५०० तोकिएको उहाँको भनाइ थियो ।
‘नर्सको १२ देखि १५ हजारबाट न्यूनतम ३४५०० मा सम्झौता गर्यौँ’, उहाँले भन्नुभयो, ‘कात्तिकपछि धेरैले त्यो तलब पाइरहनुभएको छ । पछिल्ला समयमा धेरै श्रम शोषणका बारे सुन्यौँ यस्तो उपलब्धि त भएको थिएन, यो ठुलो उपलब्धि हो । यसमा त कसैले ताली बजाएन !’ उहाँले श्रम शोषण उन्मूलन गर्न नसके पनि धेरै हदसम्म न्यूनीकरण गर्न सफल भएको दाबी गर्नुभयो ।
यद्यपि नर्स र स्वास्थ्यकर्मीहरूको सबै समस्या हल भइनसकेको प्रति आफू सचेत रहेको बताउनुभयो ।
मन्त्री शर्माले सरकारी नर्सहरूको स्तरवृद्धि जस्ता विषयमा केही कठिनाइ रहेको स्वीकार गर्नुभयो । यद्यपि स्वास्थ्य सचिव हुन ऐनले नरोकेको भन्दै उहाँले त्यसका लागि व्यक्तिगत नेतृत्व क्षमता अभिवृद्धि गर्न आग्रह गर्नुभयो ।
तपाईँको अभिमत