स्वास्थ्यमन्त्री पौडेलको अभिव्यक्तिप्रति राष्ट्रिय चिकित्सक संघको आपत्ति, मन्त्रालयलाई दियो ८ बुँदे सुझाव

राष्ट्रिय चिकित्सक संघ नेपाल (एनडीएएन)ले स्वास्थ्य तथा जनसङ्ख्या मन्त्री प्रदीप पौडेलको अभिव्यक्तिप्रति आपत्ति जनाएको छ । बिहीबार विज्ञप्ति जारी गर्दै संघले आपत्ति जनाएको हो ।

डाक्टर लिने देशसँग रोयल्टी लिने भन्ने स्वास्थ्य मन्त्री प्रदीप पौडेलको भनाइप्रति आपत्ति जनाउँदै त्यस्तो अभिव्यक्तिले डाक्टरलाई पैसामा किनबेच हुने वस्तु बनाएको र मन्त्रालयलाई बिचौलियाको भूमिकामा परिणत भएको संघले उल्लेख गरेको छ ।

गत बुधबार राष्ट्रिय ट्रमा सेन्टरको आयोजनामा सुरु भएको ‘ट्रमा एण्ड इन्जुरी लाइफ सपोर्ट’ तालिम उद्घाटन गर्दै मन्त्री पौडेलले विदेश जाने नेपाली डाक्टरको प्रसङ्ग निकालेर उनीहरूको सेवा लिने देशहरूसँग रोयल्टी लिने कुरा गर्नुभएको थियो । उहाँले त्यसबखत एमबीबीएस पढाउन राज्यको ठूलो लगानी लागेको हुने रहेछ भन्दै ती विदेशिँदा राज्यलाई ठूलो हानि हुने बताउनुभएको थियो । 

मन्त्री पौडेलले विदेशमा काम गर्न जाने श्रमिकको स्वास्थ्यको जिम्मा पनि काम लगाउने कम्पनीले लिनुपर्ने प्रस्ताव आगामी विश्व स्वास्थ्य संगठनको महासभामा लैजाने बताउनुभएको थियो ।

संघले दिएको ८ सुझाव

- नेपालका धेरै युवा चिकित्सक सरकारी सेवामा काम गर्न इच्छुक रहेकाले तत्काल राष्ट्रव्यापी O & M सर्भे गरी ३० वर्ष पुरानो दरबन्दी संरचानालाई समयअनुसार परिवर्तन गरी चिकित्सकको दरबन्दी बढाएर तत्काल स्थायी पदपूर्ति गर्न लोकसेवा आयोग मार्फत प्रक्रिया सुरु गर्ने,
- छात्रवृत्तिमा पढेका डाक्टरहरूलाई सेवा अवधिमा लोकसेवाको परीक्षा थप पढ्न पाउने अवसर दिने,
- ग्रामीण क्षेत्रमा काम गर्ने डाक्टरहरूलाई विशेष आर्थिक र अन्य सुविधा घोषणा गर्ने,
- कार्यस्थल सुरक्षित बनाउन बनेको र विगत १ वर्षदेखि स्वास्थ्य मन्त्रालयमा अड्किएको शून्य सहनशीलताको नीति लागू गर्ने,
- रेजिडेन्ट डाक्टरहरूको लागि निश्चित कार्य समय, बिदाको व्यवस्था गर्ने,
- स्वास्थ्य क्षेत्रमा अनुसन्धानलाई प्राथमिकता दिन बजेट मार्फत व्यवस्थापन गर्ने,
- नियुक्ति र पदस्थापनमा पारदर्शिता र योग्यता आधारित प्रक्रिया अपनाउने,
- चिकित्सकलाई नेपाल सरकारले सहुलियतपूर्ण ऋणको व्यवस्था गर्ने ।