स्नातकोत्तर गरेका नर्सको नाम दर्ता परीक्षाबिनै हुने

नेपाल नर्सिङ काउन्सिलको परीक्षामा पास भएपछि मात्रै स्नातकोत्तर गरेका (विशेषज्ञ नर्सिङ) जनशक्तिको नामदर्ता गर्ने तयारी गरिएकाेमा उक्त तयारी स्थगित गरिएको छ । भदौ १ गते बसेको काउन्सिलको बैठकले विशेषज्ञ नर्सिङ जनशक्तिलाई नाम दर्ता गर्नका लागि परीक्षा दिन नपर्ने यस अघिकै व्यवस्थालाई निरन्तरता दिने निर्णय गरेको हो । 

काउन्सिलका अध्यक्ष प्राध्यापक सरला केसीले विशेषज्ञ नसिङ जनशक्तिको परीक्षा लिनका लागि कुनै पनि तयारी नभएको र परीक्षा सञ्चालनका लागि जनशक्ति पनि नभएकाले अर्काे व्यवस्था नभएसम्मका लागि पुरानै व्यवस्था अनुसार नाम दर्ता हुने निर्णय भएको जानकारी दिनुभयो । 
 काउन्सिलले स्नातकोत्तर गरेका नसिङ जनशक्तिलाई उनीहरुका अध्ययनको कागाजात प्रमाणीकरण गरि नाम दर्ता गर्दै आएको छ । काउन्सिलले स्नातकोत्तर गरेका नर्सहरुको पनि परीक्षा लिएर मात्रै नाम दर्ता गर्ने तयारी गरेको थियो । 

तोकिएको योग्यता पुरा गरेका नर्सहरुले आगामी १ असोज देखि विशेषज्ञ नर्सिङ रुपमा नाम दर्ता गरी पाउँ भनेर अनलाइन फारम भरेमा रजिष्ट्रेसन समितिले त्यसबारेमा छलफल गरी उपयुक्त ठहरिएमा नाम दर्ता हुने काउन्सिलले जानकारी दिएको छ । 

हालसम्म काउन्सिलामा ६४५ जना विशेषज्ञ नर्सको नाम दर्ता छ ।