साँढे जुधाई कार्यक्रममा बार भत्किँदा ४ जनाको मृत्यु, ३०० बढी घाइते
हेल्थपाटी - आषाढ १३, २०७९ १३:३४ मा प्रकाशित
अ +
अ -
दक्षिण अमेरिकी देश कोलम्बियामा साँढे जुधाई कार्यक्रममा दुर्घटना हुँदा ४ जनाको मृत्यु भएको छ । आइतबार दिउँसो(नेपाली समय आइतबार राति) खेल चलिरहेका बेला काठको बार भत्किएको हो ।
घटनाको भिडियो सामाजिक सञ्जालतिर देखिन्छ।
भिडियोमा हेर्दा मैदानलाई काठको बारले घेरिएको छ । खेलमा सहभागीहरुले बीचमा बाँधेर राखिएको एउटा साँढेलाई जिस्क्याइरहेको देखिन्छ । त्यसैबेला एक भागको बार ढल्छ । सहभागीहरुको भागाभाग हुन्छ । ढलेको बारमा धेरै जना च्यापिएको देखिन्छ ।
स्थानीय स्वास्थ्य अधिकारीलाई उद्धृत गर्दै बीबीसीले दिएको खबर अनुसार घटनामा ३२२ जना घाइते भएका छन् ।
मृत्यु हुनेमा २ जना पुरुष, एक महिला र एक जना बच्चा रहेको बीबीसीले जनाएको छ।
तोलिमा राज्यस्थित एल स्पिनल शहरमा साढे जुधाइ कार्यक्रम भइरहेको थियो । साढे जुधाइ कार्यक्रम यो शहरमा मनाइने ठूलो पर्व सान पेड्रो अन्तर्गतको एक कार्यक्रम हो । यसलाई स्थानीय भाषामा ‘कोर्रालेजा’ भनिन्छ ।
यस कार्यक्रममा सहभागी हुनेहरु रिङमा छिरेर साँढे जुघाउने कार्यक्रममा प्रत्यक्ष सहभागी हुने गर्छन् ।
तपाईँको अभिमत